Segun un comunicado di gobierno, e programa di luz den bario ta siguiendo, y awor ta trahando tambe riba e aspecto di mas siguridad pa e ciudadanonan, construyendo verkeersplateau unda cu ta necesario.
E proyecto aki ta na encargo di DOW, unda e expertonan a diseña e verkeersplateau basa riba e sistema di trafico di Aruba y cu no ta costa sumanan astronomico, manera tabata e caso den pasado segun gobierno. E comunicado ta sigui splica cu riba un anochi DOW ta sali cu un team di mas o menos 12 persona y ta traha te mainta, ora cu e ultimo klinker di e verkeersplateau wordo poni.
Alvin Geerman, 1ste Project Medewerker, kende ta supervisa e proyecto tabata presente na Kolibristraat y a splica cu e proyecto aki ta uno hopi bon pa logra baha velocidad di e autonan. Mayoria biaha e verkeersplateaunan aki ta wordo construi memey di un pida caminda largo, unda ta corta un 10 meter cu nan ta bay traha riba dje. Ta saca e asfalt bieu, cob’e un poco y despues pak e buraco. Despues cu e capa wordo poni, ta decor’e cu klinkers.
“Nos ta traha e verkeersplateau den un anochi. Nos ta yega cu mas o menos 12 hende, cada ken sa su trabou. Tambe nos ta haci uzo di bobcat, jackhammer, etc.. Pa mainta e trafico por pasa normal, pasobra e trabou ta cla”, Sr. Geerman a splica. Di januari pa awo a construi 15 verkeersplateau na diferente area di Aruba y tin 35 mas pa construi. “E hendenan no ta preocupa cu e molester di trabou. Nan ta contento y tin caminda cu hasta koffie nan ta traha pa nos,” e comunicado a termina bisando.
