Ora bo pasa den caya actualmente por mira diferente tipo di construccion tumando luga y esaki ta preocupando hopi comerciante pa motibo cu nan ta haya e ta spanta cliente.
Gerente di Keke Department Store na playa ta conta Bon Dia Aruba cu e ta un poco preocupa cu e trabaonan na Oranjestad ta tardando asina hopi pa motibo cu esaki ta spantando hopi cliente y actualmente no tin hopi movecion mes den caya pa e motibo aki. E ta agrega cu lo ta porta miho si nan habri un parti di e caminda y drecha esaki den un manera cu no ta bay spanta cliente y pone nan kere cu henter e area ta cera.
Supervisor di e proyecto cual ta bao Arubaanse Wegenbouw Maatschappij ta splica Bon Dia Aruba cu nan no por habri e caminda actualmente pa motibonan di siguridad. Si e camindanan no ta cera e ta bira dificil pa move trucknan of materialnan pa e trabao bay mas lihe. Ta pa e motibo aki y pa motibo di siguridad ta prefera di mantene esaki cera te ora cu yega asina leu cu por habri sikiera un seccion di e caminda aki bek sin problema. Dentro di 2 siman segun e supervisor, e partinan na Weststraat bay pariba ta bay keda cla pa nan sigui bay direccion di parada di bus. Ta pidi pa tin pasenshi pa motibo cu ta hopi trabao segun e supervisor ta splica y no tin ningun retraso pues e trabaonan ta bay keda cla riba e fecha stipula cual ta den luna di Mei.
Den cuadro di loke ta e proyecto ”Renobacion Urbano” na Oranjestad, Ingeniero y Director na DOW Sr. Marlon Croes ta splica cu tin diferente trabao tumando luga. Un di esakinan tabata e caya grandi cu a wordo drecha completo, y aworaki ta den e fase pa rond af e ultimo detayenan pa finalisa esaki. E ta agrega cu si wak bon, DOW cu tiki parti financiero cu tin riba presupuesto asina mes, entre otro, a logra traha riba Hendrikstraat y Waterweg cual ta e cayanan pa noord patras di Aruba Bank y CMB y drecha esakinan. Aworaki ta enfatisando riba e partinan preparatorio pa cuminsa cu e di dos fase cual ta e Middenweg, Windstraat y Zandstraat y otro cayanan parti pariba cu kier finalisa e aña aki. Pa 2017/2018 tin intencion di parti e seccion pa zuid di caya Betico y otro cayanan pa cuminsa e trabaonan di pone sistema di riool nobo, pasada pa hiba awa di awasero y tur locual falta pa renoba ainda.
Pa locual ta e partinan den Weststraat den cercania di tienda La Aruba, tin hopi cosnan bieu den e caya aki manera tubonan di asbest cu a wordo saca caba den e manera cu regla ta prescribi. Aworaki ta sigui cu trahamento di banchi, pavers y fundeshi pa e palo di luznan nobo cu ta bini. For di salida di waf te cu na fin di caya ta conecta na otro den un comunidad locual e proyecto aki ta bay zorg pa e mustra mas nechi y opera hopi mas miho segun Sr. Croes.
Tuberia di Asbest
Unda cu tin sistema di riool bieu poni den añanan 1940/50 ta tubonan di asbest ainda segun Sr. Croes. Tin diferente preparacion tumando luga pa cambia tur esaki rond di henter e isla pa motibo cu e tubonan aki ta extremamente bieu y no tin e capacidad mas pa traha manera debe ser y esaki ta dunando hopi dolor di cabes segun Sr. Croes ta splica. Actualmente ta gewoon cambiando e tubonan ora cu nan cay pero e deseonan di DOW ta pa adelanta e proceso mas lihe cu ta posibel. DOW Ta purba di drecha bario pa bario y parti esaki anual den un manera eficiente pa por yega na drecha tur esaki prome e cuminsa trece problemanan hopi mas grandi. Ora cu tur cos ta structura ta bay por cambia e tubonan di asbest pa Polyvinyl Chloride (PVC).
