For di e construccion di e plasa Juan Pablo Duarte na altura di hospital bieu, tur aña riba dia 27 di februari, Consulado Dominicano na Aruba hunto cu otro instancianan manera Fundacion Dominicana Arubanse Juan Pablo Duarte, ta organisa e acto protocolario di nan dia nacional di independencia.
Ayera mainta no tabata un excepcion, caminda nan a celebra e di 173 aniversario di nan independencia den presencia di nos autoridadnan local, entre nan presidente di parlamento,Mervin Wyatt-Ras; minister di Asuntonan di Integracion, Benny Sevinger, hefe di Relacion Exterior Edwin Abath, miembronan di Parlamento, ademas di e miembronan di e cuerpo consular acredita na Aruba, entre otronan.
Gobierno di Aruba
Minister Sevinger a señala cu e celebracion aki ta uno “special ya cu ta wordo conmemora 173 aña di independencia di e bunita isla di Rep. Dominicana”. Un fecha cu nan no mester lubida, ya cu e ta un fecha di hopi lucha y sacrificio di e pueblo Dominicano. El a expresa su excuus den nomber di minister presidente kende no por a bay pa motibo di kebrante di salud.
E tabatin palabra di elogio pa e comunidad Dominicana na Aruba, ya cu nan hendenan ta traha duro den beneficio di nos isla. “E ta un colonia cu a integra su mes totalmente den nos cultura y actividadnan di nos bunita isla di Aruba”, sr. Sevinger a bisa. Na final den nomber di gobierno di Aruba, minister Sevinger a gradici e esfuerso y contribucion di e Dominicanonan pa yuda desaroya nos isla. Tambe el a bisa cu e Gobierno di Aruba ta y lo ta un aliado di e pueblo Dominicano; y si nan ta confronta algun problema, nan por bin bati nos porta y “hay estaremos”, el a declara. Ademas el a laga sa cu ayera tabata un dia pa celebra hunto cu e pueblo Dominicano. E ta un dia segun e mandatario pa bay baila cu nan Regeton y Bachata, den cuadro di nan dia di independencia.
Consul Dominicano
Den su elocuente discurso, consul Dominicano na Aruba, Mateo Zabala a bisa cu nan ta celebra feliz y den union e historico proceso di independencia cu ainda nan ta sigui traha dia tras dia riba dje. “E ta un esfuerso di construi y fortalece e patria Dominicana.” A pesar cu a transcuri 173 aniversario cu nan ta gosa di un pais y republica propio, sinembargo el a indica cu construi un pais no ta caba cu e hisamento di un bandera ni cu e redaccion di un constitucion. Sino cu eleva y defende nos patria ta un trabou continuo cu ta renoba su mes dia pa dia; y di generacion pa generacion.
E diplomatico a haci un yamado pa tur nacion por traha hunto pa mantene bibo e Republica Dominicana, pero e republica di cualkier pais, y pa logra esakinan mester mantene bibo e ideanan cu a bira nan fundeshi, esta libertad, solidaridad y union. Actualmente nos pueblonan ta confronta un conkista di libertad nobo, ya cu e lucha of guera di awendia no ta contra otro pais opresor, ni ta wordo bataya como antes, pero igualmente nan ta pone na prueba “nos balor y curashi” como nacion. E bataya di awendia di nos paisnan ta un lucha pa kibra e bareranan economico, social y cultural cu ainda ta separa hopi pais for di e berdadero libertad, segun consul Dominicano. Den e lucha aki nos mes como pais mester keda confia cu nos lo sali vencedor, el a agrega.
E diplomatico a cita algun di e logronan di e gobierno di su pais di presidente sr. Danilo Medina, specialmente riba tereno di enseñansa, salubridad, infrastructura, agricultura y calidad di bida pa e pueblo Dominicano. Tambe tin logronan pa e comunidad Dominicana bibando den exterior pa nan sede diplomatico por brinda nan un vocacion di servicio pa cada un di nan. For di april di aña pasa nan ta ofrece un seguro medico gratis y subsidia pa cualkier Dominicano cu ta solicita nan sin distincion di color politico y tambe seguro di repatriacion di e Dominicano cu ta fayece den exterior . Tambe nan por aplica den nan plan di vivienda popular den proyectonan caminda e gobierno tin participacion. Tambe el a gradici e pueblo Arubiano ya cu nan a habri e portanan di nan pais, caminda e Dominicanonan a forma parti di dje. P’esey –segun e diplomatico- e Dominicanonan na Aruba tin e responsabilidad y e deber di sigui traha cu integridad, fuerte y constante, manera nan a yega di hacie semper.
