E construccion di etunnel “Agua Negra” ta un di e obranan mas compleho, cu lo construi den e proximo añanan na Sudamercia, pasobra e caminda subteraneo lo uni ciudad di San Juan na Argentina cu region di Coquimbo na Chile.
E proyecto tin un costo di 1500 miyon dollar, segun dato di empresa cu a presenta pa participa den e proceso di licitacion di e proyecto. Segun corant La Nacion di Argentina, 29 empresa a pre-califica, pa presenta licitacion di e proyecto, un proceso cu lo cuminsa na 2018. E grupo di empresa aki mester cumpli cu otro rekisito pa asina participa den licitacion, por ehemplo: Experiencia den construccion di un tunel di mas di 5 kilometer of e empresa mester tin un patrimonio di US$500 miyon. “Nos ta kere cu e obra di construccion por tarda entre 9 y 10 aña,”, segun e webpage di e ‘Entidad Binacional Tunel de Agua Negra’ (Ebitan)
“E proyecto tin planifica dos tunnel di 13,9 kilometer cada un, caminda un 72% di e largura lo coresponde na Argentina, y 28% ta coresponde na Chile,” e webpage di Ebitan ta splica.
E tunnel di Agua Negra ta ser considera e parti mas importante di un proyecto hopi grandi, manera e proyecto di un coredor bi-oceanico Porto Alegre – Coquimbo, cu lo uni oceano Atlantico cu Pacifico.
