Pa e proyecto di rehabilitacion di e refineria, CITGO Aruba Refining N.V. lo haci uzo di trahadonan pa apoya den esaki. Pa e trahadonan aki ta construyendo un Man Camp, caminda lo tin 1500 cama pa hospeda nan. E prome fase aki lo keda cla den luna di Augustus venidero.
Segun e relato ricibi di Citgo, e construccion di e Man Camp lo tin un efecto positivo riba economia di Aruba, ya cu e construccion lo genera mas o menos 100 cupo di trabou como tambe mas actividad economico den forma di compra di material y servicio. E Man Camp aki lo wordo uza pa entre 400 pa 1500 trahado, durante diferente fase di rehabilitacion di e refineria. E trahadonan na nan turno, lo aporta directamente na economia local,por medio di nan gastonan diario, segun Citgo.
Construccion di e Man Camp aki ta demostra e compromiso di CITGO Aruba pa cu e comunidad aki mientras nos ta traha pa haci e refineria completamente operacional y sigui percura pa oportunidad di trabou pa persona local asina Jose Pereira, Presidente den Funcion y CEO di CITGO Petroleum Corporation, y Director di CITGO Aruba Holding, LLC. a bisa durante su bishita recien conhuntamente cu e Vicepresidente di Refinacion di Petrleos de Venezuela, SA, Guillermo Blanco; y representantenan di e contratista Constructora Azzurra.
Segun Citgo, durante e simannan cu tin nos dilanti lo wak mas actividad tumando luga den e refineria, ya cu e proceso di rehabilitacion ta sigui. Operacion di CITGO Aruba Refinery ta planea pa cuminsa den e di dos mita di 2018.
