– Edificio bieu di Duana ta na benta pa asina inicia proyecto pa un edificio nobo di Duana.
Durante e ultimo añanan, conhuntamente cu minister di Financia y Duana, gobierno a evalua ariba kico mester wordo haci pa Duana tin un kantoor nobo cu ta cuadra cu tur exigencianan di un Duana moderno. Esaki tambe pa trahadonan por traha den un ambiente positivo y mas productivo, asina minister di Infrastractura, Benny Sevinger ta splica.
E ta bisa den un rueda di prensa dialuna mainta cu: ”Nos tin 16 mil meter cuadra di edificionan di gobierno mes cu tabata den un estado deplorabel cu nos no tabata uza. Pues e intencion tabata pa drecha edificionan di gobierno existente lo mas posibel pa baha e parti di huur di edificio di gobierno.” Den cuadro cu esaki, segun Minister Sevinger, a haci diferente apelacion cu tin edificionan cu si nan mester drecha nan mes,nan no ta cumpli cu e reto y rekisitonan pa duna un miho servicio. Den e caso ey, Duana kantoor a cay den un di e edificionan ey como tambe warda di Polis Oranjestad cu tambe lo wordo bendi pa traha un warda nobo. ”Segun nos presupuesto, nos tin e aña aki nos dilanti pa finalisa e mapanan y depende con leu nos yega cu esey, nos tin e kantoor di Duana presupuesta pa aña 2018. Sin embargo, si nos logra keda cla prome cu esey, nos lo pone den presupuesto di e aña aki.”
E mandatario ta splica cu e edificio bieu di Duana ta na benta awor y cu esey nan ta bay traha riba e edificio nobo. Infra Team ta hunga un rol di sinta cu Duana y traha riba kico ta e rekisitonan pa e Duana moderno aki, den ki direccion e mester bay anto a base di esey, un plan a wordo traha y stipula pa invita arkitectonan pa participa. E arkitectonan ta haya un oportunidad pa participa den diseña con e edificio aki mester wordo traha y ki aspecto e edificio aki mester tin. ”Den e cuadro ey, a saca un ‘aanbesteding’ unda cu 16 compania di arkitecto a participa di cual awe nos ta kies 3 di nan, a base di evaluacion cu e comision a haci.”
E comision aki ta consisti di shete persona kende a evalua tur e 16 compania cu a drenta, anto a base di punto a score e tresnan di mas miho. E comision lo scoge un di tresnan aki den e proximo dianan pa asina haya sa cua ta e arkitecto cu a gana e destaho aki pa e ora ey bay over cu e parti di construccion.
Bendemento di oficinanan bieu
Tin un comision entre DOW y DIP cu ta traha riba e renobacion di edificionan bieu di gobierno por ehempel Hulpbestuur Noord cu recientemente a bira MFA. ”Nos a saca un invitacion caba pa interesadonan cu lo kier cumpra un di e edificionan aki. Tambe tabata tin e parti di duna voorlichting riba e edificionan aki. Pa 9 di december si tur cos ta bon, nos lo habri e envelopnan hunto cu notario pa wak cua edificio y cua comerciante of grupo a entrega un bid pa cumpra e edificionan aki.”
