Ayera mainta, Constelacion 12 di Parlamento di Aruba a huramenta. Den presencia di Gobernador di Aruba Su Excelencia Alfonso Boekhoudt, y dilanti famia y publico presente, 21 parlamentario a huramenta pa forma parti di e Parlamento nobo di Aruba.
Parlamentario di fraccion MEP, Shailiny Tromp-Lee, ken tabata vice presidente di constelacion number 11 di parlamento y a keda eligi pa forma parti di e constelacion nobo, a presidi e ceremonia di huramentacion enfatisando e importancia di esaki pa sistema democratico. “Awe ta e dia cu representantenan di e organo mas halto di e pais Aruba ta huramenta y trabou di parlamento number 12 ta inicia,” el a indica.
Griffier di Parlamento, Sr. Herman Hek, a lesa e texto di huramentacion y despues, a base di orden alfabetico, a yama cada persona pa dilanti pa huramenta conforme ley den idioma Hulandes dilanti di Su Excelencia Gobernador di Aruba.
E ceremonia di huramentacion tabata parti den dos parti.
E prome parti tabata consisti di parlamentarionan cu a huramenta dilanti Gobernador di Aruba. Esakinan tabata Jennifer Arends-Reyes (AVP), Wendrick Cicilia (AVP), Endy Croes (MEP), Gerlien Croes (Futuro), Mike de Meza (AVP), Arthur Dowers (AVP), Mike Eman (AVP), Sonaly Fernandez-Acosta (AVP), Clifford Heyliger (AVP), Xiomara Maduro (MEP), Otmar Oduber (PPA), Stephany Sevinger (AVP), Hendrick Tevreden (MEP), Rocco Tjon (MEP), Shailiny Tromp-Lee (MEP), Edgard Vrolijk (MEP), y Evelyn Wever-Croes (MEP).
E di dos parti di e ceremonia a consisti di parlamentarionan cu a haci promesa dilanti Gobernador di Aruba. Esakinan tabata Gino Goeloe (Futuro), Dangui Oduber (MEP), Geoffrey Wever (Futuro) y Mervin Wyatt-Ras (AVP).
