Considerando situacion financiero y crisis di Covid-19: Minister Bikker a pidi directiva di SINBA ‘tiki pasenshi’

SINBA cu ta e sindicato di e personal di departamento di Brandweer a expresa nan malcontento y preocupacion pa e situacion cu nan ta pasando aden. Nan ta vocifera cu nan ekiponan y trucknan ta den mal estado y cada bes nan ta masha limita pa realisa nan trabao y atende cualkier calamidad.

Minister Andin Bikker, caminda departamento di Brandweer ta resorta den su ministerio, a pidi comprension na e personal di e cuerpo aki y tambe a gradici nan pa tur esfuerso cu nan ta bin realisando den e situacion cu pais Aruba ta aden.

E mandatario a declara cu nan ta moviendo diligentemente pa por adresa e preocupacion expresa pa dirigente di SINBA. El a pidi e directiva di e sindicato pa carga un tiki di pasenshi. “Y gradiciendo pa e tremendo trabao cu nan ta bin desplegando conhuntamente cu otro departamentonan den e crisis di Covid-19,” el a bisa.

El a trece dilanti e situacion financiero ‘hopi preocupante’ cu nan a hereda ora cu a drenta gobierno. Awor e crisis di Covid-19 a cambia tur e maneho di finanzas publico y tur loke gobierno mester atende pa e funcionamento di nos pais. E mandatario a bisa cu su ministerio a purba varios biaha cu no obstante e reto financiero cu tin pa nan por atende cu cierto ekiponan cu mester reemplasa.

Bikker a bisa cu nan a yega di institui un task force dia 9 di maart, kiermen cuater dia prome cu Coronavirus a bati nos porta. E ta spera cu awor cu gobierno a cuminsa bay den e diferente nivel di flexibilisacion, e task force cu nan a institui a cuminsa reuni. El a compronde cu diasabra y diadomingo nan a reuni. Nan lo bin cu recomendacionnan pa su ministerio. Nan intencion ta pa bin cu material nobo pa brandweer. Pero den e cuadro financiero actual aworaki tin retonan nobo.

El a referi cu na 2012 e dos truck ultimo a wordo cumpra pa reemplasa cuater truck. Pero e tipo di truck aki pa brandweer no ta barata. Despues di e aña ey no a wordo reemplasa niun truck mas di brandweer. Nan a purba cu cooperacion cu Hulanda y Merca pa nan por haya autonan specialisa. Nan ta purbando si nan por yega na cierto acuerdonan pa por logra e vehiculonan for di Merca cu ta e tipo di truck cu nos cuerpo di brandweer ta custumbra di traha cune.