(TMZ) – Britney Spears su Conservator personal, Jodi Montgomery, a duna comentario tocante Jamie Spears su declaracion, pero Montgomery su comentario ta trece preocupacion pa cu Britney su salud mental actual.
Montgomery ta reaccionando ta Jamie su entrega di documentonan legal riba diabierna, unda cu e ta bisa cu Jodi a expresa preocupacion tocante Britney su estado mental, yamando Britney “mentalmente enfermo” y te hasta duna sugerencia cu Britney posiblemente lo rekeri di un ‘5150’ cual ta un examinacion y hospitalisacion psikiatrico involuntario.
Jodi ta bisa, pa medio di su abogado, cu Jamie a malinterpreta su posicion, “na ningun momento Jodi Montgomery a expresa na meneer Spears cu Britney Spears lo cualifica pa un hospitalisacion di tal manera. E preocupacion cu Montgomery a trece dilanti durante nan yamada telefonico ta cu si forsa Britney Spears subi podium y testigua of pa somete su persona na un evaluacion por move e situacion den e direccion incorecto y causa daño na Britney Spears su salud mental.”
Manera conoci, e tabata Britney ken a expresa na e hues cu e tabata kier testigua den juni. Y Jodi su abogado no ta bisando cu Jodi no a trece dilanti cu e evaluacion ‘5150’ no ta un posibilidad, pero nunca Jodi a bisa cu Britney Spears ta cualifica pa un hospitalisacion psikiatrico involuntario.
E abogado a sigui comenta, “Montgomery no tin ningun preocupacion pa cu Britney Spears su comportamento actual, y tampoco tocante su salud mental, manera Jamie Spears a trece dilanti den su declaracion, pa motibo di privacidad medico, Montgomery no por drenta den mas detaye pa cu e preocupacionnan cu el a expresa, pero si ta detaya cu si Jamie Spears sigui sirbi como Conservator na luga di un profesional neutral, e lo tin un impacto severo riba e salud mental di Britney Spears.”
Jodi su abogado tambe a nota cu Jamie a bisa den su documentonan legal cu ta Jodi ken a somete Britney Spears den un facilidad di salud mental den aña 2019. Montgomery su abogado ta bisa cu Jodi tabata solamente e gerente di e caso di Britney den e tempo aki, no su Conservator, y el a firma e documentonan di admision den peticion di Jamie.
Loke ta interesante pa nota ta, cu na momento cu Britney a testigua den juni, el a bisa e hues cu el a ser forsa di drenta e facilidad, pero Jodi su abogado aparentemente tin un problema cu e declaracion aki, bisando “Britney Spears a duna su consentimento pa drenta e facilidad aki den aña 2019.”
Abogado di Montgomery ta clausura su respuesta bisando “por ultimo, mi kier bisa cu Jodi Montgomery ta sumamente desapunta cu su yamada telefonico cu Jamie Spears haci pa motibo di aprecio y cariño genuino pa Britney Spears, y cu e intencion di reestablece un relacion di trabao cu Jamie Spears pa asina por mehora Britney Spears su salud mental y bienestar, awo ta ser mal interpreta y manipula pa por gana un sorto di bentaha tactico den e procedencia di kita su persona como Conservator.”
