Conservacion total di nos naturalesa (flora y fauna) mester sosode na un manera structural pa esaki funciona debidamente, cual poco poco ta pasando na Aruba pero ainda falta mas envolvimento di e comunidad mes pa logra esaki.
Den combersacion cu Greg Peterson di Aruba Birdlife Conservation y presidente di hunta di comisario di fundacion Parke Nacional Arikok, a bin dilanti cu aparentemente nos no tin e tradicion of motivacion pa cuida nos flora y fauna na Aruba. “Masha poco”, sr. Peterson ta comenta. Actualmente Parke hunto cu expertonan internacional a cuminsa e prome paso pa locual ta conservacion di nos bestianan na peliger aki na Aruba. “Tur e construccionnan cu a tuma luga ta mustra e negligencia aki contra naturalesa. Si nos por cuida carnaval y sector di turismo manera ehempel, y nos haci mescos pa nos naturalesa, nos ta bon para.”
Recientemente Parke Arikok a haya bishita di entre otro aeropuerto y WEB pa consehonan pa locual ta trata algun trabaonan cu nan ta bay haci anto e impacto na naturalesa. Esaki ta un cuminsamento positivo caba pa unda nos mester yega generalmente cu tur compania/organisacionnan pa apoya e esfuersonan pa haci cosnan debidamente tumando den consideracion nos naturalesa, segun sr. Peterson.
‘Protege locual bo stima’
Na Parke Arikok nan a cuminsa prome cu algo cu bo por identifica bo mes cu ne; pa protege locual bo stima. Desde 2011, Parke Arikok hunto cu tur otro hendenan envolvi ta trahando pa laga comunidad compronde pa kico mester stima e shoco. E parha a resulta despues di bira un simbolo nacional y Gian Nunes, Research & Conservation manager na Parke Arikok a hiba esaki na henter un otro nivel. El a trece e hendenan corecto hunto local y di afo anto ta trahando dianan largo pa locual ta e plan di conservacion. Un plan manera esaki sea ta pa shoco of cualkier otro flora of fauna ta encera masha hopi trabao mes.
Por ehempel, ta tarda sikiera algun dia pa un shoco custumbra na un otro luga pa ora mester realoca nan for di areanan di construccion, cual ta rekeri oranan largo di analisis y otro trabaonan riba veld. Siguiente lo mester tin un persona encarga pa tin suficiente ratonnan (breeding) pa e shoconan cu mester wordo rescata, algo special asina ta locual cu no tin na Aruba. Mester algun haula diseña special cu e parha no ta herida su mes ora e purbando di sali for di dje y asina tin mas otro cosnan practico cu mester tene na cuenta den un plan di conservacion.
Flora/fauna diferente cu otro paisnan
A cuminsa cu conservacion di nos shoconan pasobra nan ta practicamente bayendo den extension, pero e trabao no ta stop akinan, manera nos a menciona den nos publicacion anterior. Siguientemente lo bay over na e prikichi, cascabel, conenchi y raton di anochi cual tambe nan a cuminsa cu esaki caba. Asina e meta ta pa sigui cu tur nos bestianan y naturalesa en general den necesidad di proteccion. Parke Arikok tin fondo limita pues hopi biaha mester depende riba hende cu pasion cu ta ofrece nan tempo y ta stima naturalesa. Segun sr. Nunes ta conta nos, hopi di nos flora y fauna na Aruba ta unico. No por bay otro parti di mundo por ehempel pa mira con ta trata cu e shoco aki na Aruba pasobra ta akinan so tin nan, pues nos mes tin cu hacie. Anto esey ta conta pa hopi otro bestianan tambe. Locual ta wordo uza ta sabiduria/experiencia cu tin caba obtenibel rond e temanan aki. Sr. Nunes su rate di captura di shoco ta 6/6 cual ta 100% cu e por captura nan despues di instruccionnan/training cu el a haya for di experto internacional David Johnson, kende tin 42 aña di experiencia. “Abo purba di bay gara un shoco wak con largo e ta tuma bo”, sr. Peterson ta bisa.
Idea robes tocante conservacion
Hopi hende tin e idea totalmente robes ora ta trata di conservacion y ta pensa cu tur cos ta cientifico, segun sr. Peterson. “Ora bo no core cu bo jeep den areanan cu no ta necesario, asina bo ta conserva naturalesa. Ora bo no tira sushi tur caminda y hopi otro cos mas ta parti di conservacion. Nos mentalidad mester cuminsa cambia.” Recientemente por scucha comentarionan cu ‘Aruba Birdlife no a haci nada pa naturalesa anto e organisacion ta contesta cu nan no ta ‘papa Francisco.’ Nan ta un organisacion limita mescos Tortugaruba y otronan pero hendenan ta comenta por ehempel ‘pa kico no a papia ora nan a rosa tal mondi un otro caminda.’
Cuater caso den corte
Aruba Birdlife tin actualmente cuater caso cu nan ta den dje bayendo corte relaciona netamente cu e conservacion di naturalesa. Anto un di e cuater casonan ey nan ni sa ken nan ta bay bringa pasobra e compania a stop di existi algun aña pasa. Diabierna awor e organisacion ambiental lo ta den corte relaciona cu un pida tereno wetland cu a keda rosa banda di The Mill di cual nos a publica di dje siman pasa. “Hende kisas ta pensa nos tin 40 drones ta bula rond pa wak unda tur tin tereno ta wordo rosa. E mentalidad ey of ta intencional of ta pa crea duda riba nos intencion”, segun sr. Peterson.
