New Year’s Resolutions (resolucionnan di aña nobo) por ser describi como un promesa cu un persona ta haci cu su mes pa cumpli durante e aña nobo. Generalmente esaki ta consisti di diferente meta cu e persona ta pone riba un lista pa cumpli cu esakinan. Cada aña e fenomeno di New Year’s Resolutions ta bira mas popular, pero e pregunta ta keda: di berdad e ta traha?
E resolucionnan di aña nobo mas comun ta den e tereno di superacion personal, sea esaki ta baha peso, aumento di autoestima, adopta un estilo di bida mas saludabel, stop di huma, bebe menos alcohol, entre otro. Pero sa pasa cu hopi biaha e personanan no ta cumpli cu nan propio expectativanan y ta perde animo y/of interes den nan lista di resolucionnan y no ta logra cumpli cu esakinan prome cu e siguiente cambio di aña, of pa e fecha cu nan mes a stipula.
Pesey expertonan ta duna algun conseho importante cu por yuda tur persona cumpli cu nan resolucionnan di aña nobo.
Cuminsa cu moderacion
Expertonan ta recomenda pa haci resolucionnan cu nan mes por kere cu nan por mantene. Por ehempel, si e meta ta pa haci mas actividad fisico, e persona por planifica pa bay gym tres of cuater biaha pa siman, enbes di obliga su mes bay shete biaha pa siman. Si e persona kier adopta un estilo di alimentacion mas saludabel, por cuminsa cu cumindanan chikito, reemplasa cosnan dushi cu fruta of yoghurt, na luga di cuminsa cu un dieet pisa di biaha. Ta importante un punto memey cu ta un punto di comfort.
Un cambio cada bes
Comportamento dañino ta ser desaroya cu tempo, locual ta nifica cu reemplasa e comprtamentonan dañino aki tambe ta bay tuma su tempo. Pesey expertonan ta remarca cu ta importante pa enfoca ariba cambia un comportamento, un aspecto, cada bes y no riba tur di un solo biaha.
Combersa
Expertonan ta subraya cu ta hopi importante pa papia cu famia y amistadnan tocante e cambionan importante aki. Comparti experiencia por hiba na intercambio di idea, di experiencia cu otro personanan cu tambe por ta pasando den e mesun proceso pa logra nan metanan y asina ta e proceso mas agradabel.
No frustra
Segun expertonan ta hopi importante pa no busca pa perfeccion pasobra comete erornan durante e proceso pa logra e meta final ta completamente normal y hasta saludabel. E proceso no ta facil, specialmente si e meta final ta un cambio grandi y importante den e bida di e persona. Importante ta pa no give up y sigui bay dilanti, a pesar di e erornan cu por a sucede na caminda.
Pidi apoyo
Acepta ayudo di e personanan cu ta mas cercano, mas keri, por duna e persona cu ta den e proceso di cambio, den e proceso di cumpli su metanan, forsa pa sigui bay dilanti. E por brinda e habilidad pa maneha e stress causa pa su lista di resolucionnan y si e persona ta sinti incapas di cumpli su metanan su so, ayudo y apoyo por ta un herment crucial pa e yega su meta final.
