Den transcurso di e ultimo dianan prome cu eleccion,
a circula bastante mensahenan di texto straño rond medionan manera WhatsApp y Facebook relaciona cu fraude den nos sistema di votamento. Segun presidente di Conseho Electoral Glenn Thode ta bisa Bon Dia Aruba, nos sistema di vota ta uno sigur.
Recientemente a surgi diferente tipo di mensahe rond rednan social cu a resulta di ta informacion falso of cosnan djis inventa/asumi relaciona cu nos sistema di vota en conexion cu eleccion venidero. Un di esunnan mas recien a papia tocante carchinan pa vota cu ta wordo parti na hendenan cu no tin derecho di vota mes. E mensahe di texto circulando den WhatsApp a señala cu lo tin fraude grandi e eleccion aki, motibo pakico a firma decreto pa uza rijbewijs pa por vota. Mester wak tur urna bon ken ta bay vota y ken ta sinta na cada urna!, e texto a sigui bisa. Presidente di Conseho Electoral ta bisa nos cu e sistema di voto ta bon sigura y no ta posibel pa hende cu no ta den kiezersregister pa vota, pues bo mester ta registra na Censo di Aruba. Esey kiermen cu no tin ningun sentido ni beneficio den haci locual e mensahe ta describi, sr. Thode a bisa.
Voto invalido
Manera nos a yega di publica, aña pasa alrededor di 13.000 hende no a vota. Segun vice presidente di Conseho Electoral Hubert Maduro: “Cu e cifranan aki ta pasa absolutamente nada. Pasobra si bo no aparece dilanti e urna, bo no ta haya un papel pa bo vota. Pues no tin posibilidad mes pa e formularionan di vota tin un influencia un caminda. Pasobra locual bo ta haya na bo residencia ta un carta cu ta yama bo pa bin vota na cierto urna. Ora bo yega bo ta haya un papel pa bo vota cu ne y si den un urna cien hende no bin, nan ta resta cien papel blanco.”
Riba e cantidad di hendenan halto cu ta vota na Aruba segun sr. Maduro ta dificil pa distingui kico ta e motibo ora cu e porcentahe subi of baha un poco. “Ami y mas hende ta kere cu ta e control social y control di e partidonan cu ta conoci na cierto momento ken no a vota. Pues ora bo no aparece pa vota, bo ta sigur cu bo nomber ta poni den un computer. Asina temponan moderno ta bo ta wordo registra pa cosnan cu bo no a haci.”
