Prome Minister Evelyn Wever Croes den reunion cu Secretario di Estado cu potencial conseho pa medida di Reino den lomba

Prome Minister Evelyn Wever Croes e fin di siman aki (hunto cu otro lidernan di Gobierno di Corsou y St. Maarten) a reuni riba e proposicionnan di ley di consenso di Reino COHO, pero tambe e proposicion pa e RAft, e ley di consenso di Reino cu ta duna base nobo na e Colegio Aruba supervision financiero, CAft. Esaki despues cu Parlamentonan a duna nan opinion riba e proyectonan di ley, y kier mira cambio den e texto.

Pero e negociacionnan pa Aruba tin un toke diferente pasobra CAft a ilustra cu si no tin cambio den e proposicion di Presupuesto 2022, lo conseha Gobierno di Reino pa duna Aruba un ‘aanwijzing’, conoci na Aruba como KB. Un KB ta nifica cu Gobierno di Reino lo asumi e ‘ultimum remedium’ riba e tereno specifico, den e caso aki Finanzas Publico

Manera ta conoci, CAft a reacciona riba con Minister di Finanzas, Xiomara Maduro a inclui recomendacionnan pa Presupuesto 2022. Segun Profesor dr. Raymond Gradus, practicamente no a tene mucho cuenta cu e recomendacionnan. Bon Dia Aruba a ilustra varios di e puntonan, pero otro importante pa CAft ta AZV. Manera ta conoci, CAft a conseha Gobierno di Reino pa pone un condicion di recorte di 60 miyon anual den e gastonan di AZV na 2020. E tabata un di e condicionnan cu Gobierno mester a acepta a cambio di sosten di likides. E reformanan a keda palabra tambe den e landspakket di Aruba. Pero no ta reformanan desconoci. Ta for di hopi tempo, entidadnan manera IMF, Raad van Advies ta urgi pa reforma basa riba e desaroyo di gastonan.

Pero te ainda, Aruba no a logra e reduccion di 60 miyon, a pesar di recortenan. CAft ta considera cu mester tuma medida adicional pa recupera e falta di reduccion di e recorte total. E entidad ta bisa cu un di e motibonan principal di e perdida den recorte ta cu Aruba a tarda di introduci e propio contribucion y e lista positivo di remedi y otro material di cuido. CAft ta sali di e punto di bista cu na 2022 si lo logra e reduccion di 60 miyon y ta recomenda pa cumpli cu e decision di Gobierno di Reino y introduci medidanan di compensacion pa e perdida di locual mester a spaar y informa CAft riba esaki.

Segun dr. Gradus den su carta, Gobierno di Reino a pidi riba 25 di februari 2022, den cuadro di e recortenan den AZV, pa pone atencion specifico na eficiencia y efectividad na e areglo casonan serio y e fondo di cuido.

Gobierno di Reino tambe a puntra Aruba pa informa CAft pa mas tarda dia 15 di maart 2022 con ta duna forma na e fondo. Dia 15 di maart 2022, CAft a ricibi informacion di Minister di Salud y Turismo, unda e ta bisa di tin intencion pa lanta un fondo di presupuesto pa casonan preocupante y fondo di cuido. CAft a bisa, den liña cu otro consehonan riba fondonan di presupuesto, cu e tin su preocupacion pa un otro. Pa motibo di argumentonan di transparencia y mirando e estado actual di finanzas publico y maneho financiero, CAft ta recomenda pa tur beneficio y peso di presupuesto mester keda responsabel y cu no mester pone un fondo apart di e ley aki. CAft a recomenda pa usa den e presupuesto di e posibilidad cu Gobierno di Reino a brinda pa financia e inversionnan pa medio di inscripcion pa medio di Hulanda. Pa esaki logra, inversionnan mester ta suficiente y claramente argumenta, incluso kico nan efecto lo ta riba e presupuesto multi-anual.

Mester miho splicacion

Tambe Gradus ta bisa cu e Minister a splica e inversion den e planta di purificacion di awa na Bubali, e RWZI pa 16 miyon. CAft tambe ta di opinion cu e inversion aki ta di balor socio-economico. Pero locual no ta cla con tercer partidonan lo contribui na e inversion aki, por ehempel pa medio di un pago di uso di riool. CAft lo conseha Gobierno di Reino pa permiti e inscripcion pa financiamento sucede via Hulanda asina cu ta cla di ki forma terceronan lo contribui y si e financiamento ta multi-anual, incluso e gastonan di mantencion, ta bon describi.

Mas deficit

E presupuesto multi -anual ta mustra deficitnan den e periodo 2023 pa 2026. E ley cu awor ta goberna e supervision, esta e LAft y e protocol di 2018 cu Hulanda ta papia di un surplus di 1 porciento entrante 2023. Gobierno di Reino lo permiti unicamente un desviacion di e norma te cu 2022. Pero los di esey e LAft y e protocol mester keda vigente. Minister di Finanzas a bisa cu pa motibo di e desaroyo actual y e inseguridad actual no por cambia e direccion di constelacion di e debe nacional y e calculacionnan promedio.

CAft di otro banda ta remarca cu entrada di belasting y particularmente e entrada di belasting directo ta cana atras di e recuperacion economico. Segun e calculacionnan di Direccion di Asuntonan Economico, Comercio y Industria, e Producto Interno Bruto di 2023 lo yega e nivel di 2019. Mirando cu e primanan di e seguronan social ya a surpasa e nivel di pre-corona den e prome kwartaal di 2022 y e BBO por ehempel ta na nivel di 2019, por spera cu e entradanan for di belasting, exclusivo e BTW, por lo menos lo ta na nivel di pre-corona. Como tal, CAft ta ripiti su recomendacion pa procesa e recuperacion completo di entrada di belasting den e presupuesto multi-anual y duna un splicacion pa esaki.

No tin detaye di ley di BTW

E introduccion di BTW lo mester resulta na un aumento di 160 miyon na entrada. Gobierno sinembargo te ainda no a caba cu e reforma y cu unicamente lo duna detaye ora cu caba di tuma decision. Gobierno a haci mescos na 2019. E tempo ey tampoco no tabatin un base adecuado pa e plan di reforma di belasting, inclusivo e concretisacion di e plan y un argumentacion financiero. Como tal CAft no por a determina con realistico e entrada di belasting presupuesta tabata. CAft ta constata cu e suma di 160 miyon den e presupuesto multi-anual no ta argumenta. Y banda di esey, solamente a inclui e efecto presupuestario di e BTW, mientras cu SIAD ya a bisa diferente actor, manera Camara di Comercio y AHATA, cu banda di introduccion di BTW tambe lo tin medidanan di compensacion. CAft ta remarca cu tampoco a cuminza e procedura formal pa e ley cu mester introduci e BTW. Tanto e fecha di introduccion como e forma concreto di e plan di reforma di belasting lo tin influencia riba e aumento proyecta den entrada entrante 2023 cu tin como meta pa yega na surplus. Sin un splicacion adecuado lo no por determina con realistico e proyeccion di entrada di belasting lo ta. Es mas, e presupuesto multi-anual a pesar di introduccion di e BTW y e 160 miyon adicional, te ainda ta mustra un deficit na 2023 di 120 miyon.

Cu esaki, CAft ta conclui cu Aruba no ta tuma suficiente na cuenta articulo 14 di LAft y e protocol cu Hulanda. E deficit financiero den 2022 ta keda 236 miyon y esey ta haci cu debe di Aruba ta aumenta innecesariamente, cu ta haci cu e durabilidad di finanzas publico di Aruba ta bay mas for di bista.

Riba dje, no a haci suficiente pa logra surplusnan entrante 2023 cu ta necesario pa reduci e nivel di debe mucho halto di Aruba. CAft como tal ta urgi Minister di Finanzas pa duna contenido na su recomendacionnan.

24 di Juni y aanwijzing

Conseho di Minister di Reino tin decisionnan crucial pa tuma pa Aruba tambe. Y pa e fecha aki CAft ta urgi Gobierno, basa riba articulo 12 inciso 1 di e LAft pa mas tarda riba 24 di Juni, duna splicacion na ki forma lo duna contenido na e recomendacionnan cu a duna pa Presupuesto 2022. Si den opinion di CAft, e Presupuesto 2022 no ta cumpli completamente of parcialmente cu e normanan di e LAft y e protocol, CAft lo informa Gobierno di Reino. Y e notificacion aki, lo por ta acompaña cu un conseho motiva pa duna Aruba un asina yama ‘aanwijzing’, conforme articulo 12, inciso 2 di e LAft.

Potret di archivo.