Despues di cuminda, awa, energia y salubridad, conseho legal a bira un necesidad basico den nos mundo & economia moderno. Kier of no kier, casi tur di nos un of otro dia lo mester conseho legal basico.
Esaki no ta solamente pa esnan cu ta bringa caso na corte, pero pensa tambe di e entrepreneur cu kier lanta un compania y mester conseho legal/impuesto/notarial of di un verhuurder di cas cu kier un bon contract of di un persona cu ta pensa cu e ta wordo perhudica etc. Lastimamente e conseho basico aki mes lo costa un persona na Aruba por lo menos 400,- florin pa ora si no ta mas. E anjanan binidiero aki esaki lo cuminsa cambia radicalmente dor di Inteligencia Artificial Open-Source.
70% di trabou legal por wordo automatisa
Kico ta e practica di Ley riba su nivel mas fundamental? Wel Ley ta simplemente “Toegepaste Taal”. Esaki kiermen cu tin textonan/reglanan bon defini hopi complica, cu mester wordo adapta na cada situacion unico. En berdad tin scenario sumamente complica mes, manera por ehempel di un multi-nacional cu tanto factor riba y pafo di isla pa considera. Pero na un nivel di conseho basico cual pueblo di Aruba por gosa di dje, esaki por wordo automatisa casi completamente y ofreci na nos ciudadanonan como servicio gratis.
Den analisisnan hopi amplio di Goldman Sachs y J.P. Morgan ta indica cu entre 40 pa 70% di e practica di ley por wordo automatisa completamente. Vooral e nivel basico di conseho legal mas “simpel” cu un ciudadano averahe na Aruba lo tin haci cune por wordo ofreci gratis danki ta automatisacion.
Coming Soon: Bo Mesun 24/7 AI-Legal Assistant
Awo un lesador por puntra su mes, con esaki lo parce den futuro cercano? Wel mescos cu por ehempel un Whatsapp chat cu un abogado humano, lo tin un chat cu un Open-Source AI LLM “chat bot”. Nos mester bisa direct cu den pasado “chat bots” a wordo asocia cu servicio primitivo y malo. Pero den e caso aki un persona lo tin acceso na un “bot” sumamente sofistica cu lo te hasta por surpasa un abogado humano den ley/conseho basico.
E siguiente figura di un case study amplio di esaki publica na Januari 2024, ta mustra un overview di un sistema asina. E sistema aki te hasta ta usa 3 diferente open-source AI LLMs mane Llama-2, Zephyr y Falcon. Asina ta yega na e miho posible conseho legal. Nos por nota cu awo ya caba tin sistemanan mas sofistica cu Llama-2, y cu en general Open-Source LLMs ta creciendo enormemente den potencia.
Kico Bo Legal AI-Assistant por Hasi Pabo?
Wel ehempelnan ta:
Draft contract legal basico;
Inbestigacion y conseho legal na nivel di abogado den “lenguahe di placa chikito”;
Draft cartanan legal full automatisa;
Analisa contractnan y cartanan legal existente;
Duna un analisis si un cierto caso of ruta legal ta logico pa cana y si e ta bale la pena pa huur in un abogado humano.
Si tur esaki lo por wordo ofreci gratis na pueblo di Aruba, e por duna un impulso economico masivo mes. Segun Goldman Sachs e por kiermen entre 3 pa 7% extra crecemento macro-economico pa aña.
