Ayera e resultadonan di eleccion 2017 a bira oficial. Nos a pone nan di nobo riba paginanan 23 y 24 di e edicion aki. Resultado di reparticion di asiento a keda mescos cu tabata conoci segun presidente di Conseho Electoral Glenn Thode.
Hefe di Censo ta conta Bon Dia cu den november awor miembronan di Conseho Electoral den Reino, bao guia di Hulanda cu ta organis’e, lo reuni pa dialoga riba problemanan den proceso electoral. Entre otro manera metemento di politica den proceso di eleccion.
A determina oficialmente e reparticion di asiento ayera. “Reparticion di asiento a keda mescos. A comparti tambe e reparticion di asiento pa candidato pa e listanan cu asiento, y e totalidad di candidatonan cu a resulta di a saca asiento di parlamento segun ley,” sr. Thode ta bisa. Te cu ayera segun Conseho Electoral, e resultadonan di eleccion 2017 tabata temporario. Despues di e reunion di ayera na Stadshuis, e resultado ta pues final y fiho. Nan mester a atende cu un keho cu tabata specifico en cuanto resultado di un stembureau. Sr .Thode: “A controla esaki anto a mira cu tabata tin diferencia di un voto riba candidato robes. A coregi esaki. Den un sistema automatisa e tipo di erornan humano aki no lo tuma luga.” Por mira e lista di resultadonan riba www.censo.aw.
Sistema automatisa
Segun hefe di Censo Sharin Luydens, tin diferente manera pa bay over pa automatisa e proceso di votacion. Riba rednan social nos por a tuma nota por ehempel cu algun hende a reacciona contra automatisa/digitalisa e proceso di votacion. “Si hefe di Censo no kier traha manera cu cos ta, busca otro trabao,” tabata entre otro e comentarionan.
Otronan ta bisa cu no ta necesario pa cambia esaki pa digital pasobra y ta prefera di keda cu proceso anticua pasobra: “Varios pais kier bay bek na papel cu potlood pa via di pompamento cu computernan.” Hende ta haya cu e sistema cu nos tin caba ta uno mas safe.
“Na november awor nos tur di Conseho Electoral den Reino, lo reuni na Corsou pa papia di tur e problemanan aki. Tambe entre otro metemento di politica den proceso di eleccion. Pacheco Romer, presidente di Conseho Electoral na Corsou,cual mi tin un laso estrecho di trabao, lo ta anfitrion di esaki. Y nos ta sostene cambionan di cierto procesonan digital,” sra. Luydens ta bisa Bon Dia Aruba. El a sigui expresa cu den un era digital y exigencia di comunidad pa tur cos bay lihe, no ta bay man den man cu un proceso anticua cu ta exigi hopi esfuerso humano. El a conclui: “E ley di Kiesverordening ta hopi bon hinca den otro. Pero cierto proceso por wordo haci mas eficiente pa motibo di tecnologia caminda erornan humano y esfuerso humano por wordo evita.”
