(AP) — Conseho di Seguridad di Nacionnan Uni ayera a rechasa un solicitud di Rusia pa investiga e explosion na e tuberianan cu ta move gas natural for di Rusia pa Europa bao di Lama Baltico.
Rusia, China y Brazil a vota na fabor di e solicitud Ruso, pero e otro miembronan di Conseho di Seguridad a abstene of a bisa cu otro investigacion ta innecesario.
Pa Conseho di Seguridad di ONU adopta un resolucion, e mester un minimo di nuebe voto “si” den e conseho di 15 miembro, y ningun veto di e miembronan permanente – Merca, Rusia, China, Reino Uni y Francia.
Embahador interino di Merca, Robert Wood a bisa cu no tin necesidad pa un investigacion di ONU mientras cu investigadornan di Suecia, Dinamarca y Alemania “ta procediendo den un forma comprensivo, transparente y imparcial.”
E tuberianan conoci como Nord Stream 1 y Nord Stream 2 ta propiedad di gigante di energia estatal Ruso, Gazprom. Nord Stream 1 tabata transporta gas Ruso na Alemania te cu Moscu a corta e suministro fin di augustus 2022. Nord Stream 2 nunca a drenta den servicio ya cu Alemania a suspende su proceso di certificacion tiki prome cu Rusia a invadi Ucrania dia 24 di februari 2022. Explosion di ambos tuberia a tuma lugar dia 26 di september.
E investigacionnan di nacionnan Europeo ainda no a duna resultado conclusivo, al menos ningun cu a publica. Ambos tuberia ta pasa door di rutanan existente cu ta pasa door di Ucrania, loke ta nifica cu Ucrania por perde entrada di tarifanan di transito si no por usa directamente e gas cu nan ta transporta. Tabata mira e tuberianan como un esfuerso di Rusia pa haya mas control riba suministro di energia Europeo.
The New York Times, The Washington Post y medionan di comunicacion Aleman a publica storianan citando oficialnan Mericano y otronan bisando cu tabatin evidencia cu Ucrania, of al menos Ucranianonan, por tabata responsable. Gobierno Ucraniano a rechasa di ta involucra.
Presidente Ruso, Vladimir Putin a rechasa como “nonsense” acusacionnan cu Ucranianonan por ta tras di e explosion y a punta dede riba Merca.
