Despues cu tratamento den Eerste Kamer di e propuesta di ley pa yega na un areglo pa disputa entre Reino, y e partnernan den Reino, Conseho di Ministro di Reino ayera a tuma e decision pa revoca e propuesta definitivamente. E tratamento den Eerste Kamer, despues cu e proyecto a haya aprobacion den Tweede Kamer caba, a topa cu resistencia fuerte di e tres islanan. Punto importante den nan protesta tabata cu e ley finalmente no ta contempla un instancia cu ta dicidi di forma obligatorio den un disputa, sino cu e ta keda solamente un conseho riba cual Conseho di Ministro di Reino, cu mayoria Hulandes semper, ta dicidi si ta acepta e conseho.
Varios aña pasa Tweede Kamer a acepta un mocion den cual a pronuncia cu e veredicto di un organo independiente mester ta ‘bindend’ y despues gobierno Hulandes a formula un ley den cual ta designa un sala special di Raad van State cu e tarea pa evalua e disputanan, despues di cual lo a bay un conseho pa gobierno di Reino. Solamente den caso cu argumento di hopi peso gobierno lo por a desvia di e conseho, pero asina mes a keda e resistencia di e islanan, ademas cu Raad van State mes tampoco tabata contento cu e papel di consehero cu nan a haya den e opcion aki.
Despues cu e tratamento den Eerste Kamer no por a avanza mas, y no tabatin y lo no tin apoyo di tres di e cuatro partnernan den Reino, Conseho di Ministro di Reino ayera a dicidi di revoca e proyecto di ley. Cu esaki, despues di varios aña di discusion intenso, ainda no tin un areglo pa e casonan di disputa huridico entre Reino y e partnernan den Reino. Articulo 12a di Statuut ta prescribi e institucion di un areglo pa atende e tipo di disputa aki, loke por lo pronto no lo keda cumpli.
