Diaranson 14 di februari, Conseho di Minister di Aruba a reuni cu e delegacion di Eerste Kamer di Hulanda. 15 miembro di Parlamento di Eerste Kamer cu ta forma parti di e comision fiho pa relacionnan den Reino, tabata presente den un reunion cu a dura casi dos ora, den cual Gobierno di Aruba a duna un presentacion, un ‘Snap Shot’ di unda Aruba ta para na e momento aki.
Despues di e presentacion, tabatin oportunidad pa miembronan di Eerste Kamer haci pregunta y Gobierno a duna tur informacion cu nan a pidi, segun un comunicado di gobierno. Prome Minister Evelyn Wever-Croes a expresa e importancia pa dialoga y duna informacion corecto. Esaki tambe, Prome Minister a indica, tabata e meta di Gobierno di Aruba.
Segun e comunicado, durante e reunion a elabora riba e tema di refinanciamento di e debe cu Hulanda. Mayoria di Eerste Kamer ta di acuerdo cu Aruba cu Hulanda no por cobra e 6.9%, e comunicado ta menciona. Y esaki ta loke Profesor Nicolai a indica tambe varios biaha den debatenan. Otro miembronan di Eerste Kamer tambe a expresa esaki y den e reunion a ripiti esaki.
“Mi tin tur fe y confiansa cu nan lo yuda nos den e lucha aki pa asina Aruba logra baha e interes halto aki di 6.9%. Na fin di dia ta hopi importante pa tin bon relacion cu institutonan asina cu ta trata leynan cu tin di haci cu Aruba y p’esey ta hopi importante pa reuni y intercambia informacion”, Prome Minister Evelyn Wever-Croes a expresa.
