Conseho di Minister di Reino ta refinancia sosten di likides sin interes; Pero no ta duna sosten di likides pa siguiente kwartaal

E sosten di likides cu Hulanda a duna Aruba lo keda refinancia cu cero (0) interes. Esey ta e decision di Conseho di Minister di Reino di Diabierna, 25 di Maart 2022. E decision ey ta conta pa e prestamo cu a duna na Corsou, St. Maarten y Aruba. Ta trata di un total di mas di un biyon euro cu Hulanda a ofrece como sosten di urgencia durante e pandemia di COVID-19. Lo refinancia e suma aki permanentemente sin interes.

Hulanda a ofrece e paisnan dentro di reino sosten durante di e pandemia. Esaki, entre otro cu ayudo pa cuido medico y financiero. A duna Aruba un sosten di likides di 915,5 miyon florin. Corsou a ricibi un sosten di 911 miyon florin Antiano, mientras cu Sint Maarten a ricibi 292,4 miyon florin Antiano na sosten di likides.

E fianzanan sin interes tabata necesario pa e paisnan por a sigui paga nan debenan y pa subsidia salarionan suministra dor di companianan pa trahadonan. Na e manera aki a preveni bancarota y desempleo, durante di e temporada cu turismo a cay afo door di COVID.

E fianzanan di likides aki ta core te cu 10 april 2022. E situacion economico no a recupera suficientemente, pa realisa e pago di e fianzanan. Pa e motibo ey a dicidi pa prolonga e fiansa sin interes, cu un periodo di 18 luna. Ta e intencion pa usa e temporada aki, pa realisa a largo plaso palabracionnan encuanto pago di e fiansa.

Di otro banda, Aruba, pero tampoco Corsou y St. Maarten a ricibi sosten di likides pa e siguiente kwartaal. Conseho di Minister di Reino no a considera cu esaki ta necesario pa e islanan por sigui dilanti.

“E noticia menos bon ta cu Aruba no ta ricibi sosten di likides pa e kwartaal aki, ya cu Conseho di Minister di Reino, riba conseho di CAft, ta haya cu nos mester baha mas gasto den e presupuesto 2022, entre otro, mester corta mas den gastonan di cuido medico di AZV, mester corta mas den salario y no paga e 12.6% e aña aki, y mester hisa loonbelasting”, minister di Finanzas, Xiomara Maduro a comenta. “E presupuesto di 2022 lo wordo trata otro siman den Parlamento, y despues lo sigui e deliberacionnan cu Hulanda. Mientras tanto, e hecho cu no a ricibi sosten di likides ainda, ta pone presion riba e situacion financiero di nos pais, pero mescos cu otro kwartaal Aruba lo sa di cumpli cu pago di gasto y di debe.”