Prome minister Evelyn Wever-Croes den un conferencia di prensa ayera mainta a trece dilanti diferente topico. Eentre nan, el a señala cu den reunion di Conseho di Minister di Reino na Den Haag a aproba e proposicion di Gobierno di Aruba pa prolonga e termino di Gobernador Alfonso Boekhoudt pa un termino mas.

E periodo aki lo a vence dia 1 di januari di 2023, pero Gobierno di Aruba, mirando e experiencia, respet y cariño cu Su Excelencia Gobernador Boekhoudt ta gosa di dje den comunidad di Aruba, nan a haci un apelacion pa un termino mas e cual gobernador Boekhoudt a acepta y a wordo a proba den conseho di ministernan di Reino.

E periodo aki ta cuminsa 1 di januari 2023 y lo caba 1 di januari di 2029, manera prome minister a expresa.

“Gobierno di Aruba ta felicita y ta gradici gobernador Boekhoudt pa su disponibilidad di sigui sirbi comunidadnan den Reino”, el a bisa.

Para hunto pa bisa ta basta pa violencia contra hende muhe

Den otro tema, prome minister a trece dilanti cu dia 25 di november ta e dia internacional pa eliminacion di violencia contra hende muhe, unda mester pa para keto y uni na e causa aki.

Na Aruba 1 di cada 3 muhe ta bira victima di violencia y esaki ta algo cu ta hopi preocupante, no ta solamente 1 di cada 3 ta sufri abuso fisico, nan tambe ta sufri abuso emocional of verbal, “pasobra tin biaha cu palabra ta haci hopi mas daño cu e mesun abuso fisico, y mi ta kere cu e impacto cu esaki tin no solamente riba e hende muhe aki sino riba e famia, con ta afecta e yiu cu ta un mucha cu di chikito ta lanta cu un trauma asina, esakinan ta momento cu nos mester realisa e señalnan alarmante den nos comunidad a consecuencia di violencia contra hende muhe”, prome minister a indica.

Asina mes, el a reitera cu tin un solucion pa e problema aki cu ta den man di comunidad, pa cada un persona traha pa stop violencia contra hende muhe, tanto violencia fisico como violencia verbal door di esnan cu ta kere cu ta ofende y humiya hende muhe simplemente pa motibo cu nan ta hende homber.

Bersturkantoor a cende su luznan oraño ayera 6or di atardi pa asina uni na e causa aki, pa sostene y pa convivi cu esnan cu ta victima di abuso contra hende muhe. “Ta un momento cu nos ta uni y nos ta confirma nos compromiso pa caba contra e tipo di violencia aki contra hende muhe”, el a declara.

Biahe pa Hulanda

Prome minister tambe a informa cu otro siman, su persona hunto cu minister di Finanzas y Cultura, Xiomara Maduro tin cu haci un biahe pa Hulanda unda nan lo haci diferente bishitanan di trabao riba e tema di recuperacion economico di Aruba.

Den esaki, el a splica cu nan ta bay informa con Aruba a bin recuperando financieramente. Manera a indica caba, Aruba tabata un di e paisnan mas afecta pa pandemia di Covid-19 y tambe e di dos na mundo cu a recupera mas lihe.

“E meta di e bishita y tur e reunionnan aki ta pa presenta e plan di recuperacion di Aruba y mira unda Hulanda por yuda nos pa esaki bay mas lihe”, el a indica.

Aunke esey no ta e tema principal, sino cu tin otro temanan cu tambe ta importante. Wever-Croes a comenta cu nan ta bay mira con 2023 ta wordo proyecta, e asuntonan di mas grandi cu tabata causa discusion entre Aruba cu Hulanda a wordo atendi y resolvi.

Tin tres palabracion cu nan a tene cu Hulanda ora nan a yega na gobierno na 2018, manera el a sigura. E prome punto ta pa yega na un surplus, unda cu Aruba a haya un surplus na 2019 pero na 2020 pandemia a yega y a causa dificultad financiero. Awor na 2023 nan ta bay logra e surplus y nan ta back, manera prome minister a sigura, riba e trayecto di finanzas publico sostenibel cu tabatin prome cu pandemia.

Gastonan di personal ta sigui baha, esey tabata un palabracion cu nan tambe a haci na 2018 y ta algo cu ta resolvi pa mantene e nivel ey.

E di tres palabracion ta algo cu nan no a logra cumpli cune cu ta trata e quota di e debe di GDP, unda na 2018 nan a palabra cu na 2037 nan tin cu yega na 50% di e debe di GDP.

“Cu e debe gigantesco di Covid19 di 916 miyon cu Aruba a presta for di Hulanda den pandemia” prome minister a splica cu nan no por yega na e meta aki y p’esey nan tin cu bay Hulanda pa presenta alternativanan pa mira con Hulanda por yuda cu esaki.

Nan lo tin reunion cu prome minister Mark Rutte, minister di Finanzas, nan lo tin presentacionnan na Eerste Lamer, Tweede Kamer, cual ta e parlamentonan, Raad van Staten y nan lo reuni cu diferente otro instancia riba e tema financiero, calculacion y estadistica.