Caft a permiti Aruba desvia di su norma di presupuesto pa 2020 y ta limita e cantidad di inversion di capital na 40 miyon florin pa 2020.

Asina Secretario di Estado pa Asuntonan di Reino, Raymond Knops a informa Parlamento Hulandes. Den un carta pa Presidente di Staten General di Hulanda, Knops a bisa cu e reunion di Conseho di Minister di Reino a produci decisionnan riba necesidad financiero di e paisnan Hulandes den Caribe, y e espacio cu nan tin pa desvia di e normanan presupuestario pa motibo di e crisis di Covid19

E sumanan cu Aruba (pero tambe Corsou y St. Maarten) a ricibi como sosten di likides ta basa riba consehonan di e College Arubaans Financieel Toezicht. Gobierno di Hulanda a ricibi e ultimo conseho di Caft dia 4 di november ultimo. Segun Caft, e necesidad financiero di Aruba te cu fin di 2020 ta di 209 miyon florin. Aruba ta haya e suma aki mesora despues di a yega na un acuerdo durante e mesun reunion. A bay de acuerdo basa riba articulo 23 di e Landsverordening Aruba financieel toezich cu un desviacion di e saldo di financiamento cu Aruba mester a cumpli cune, incluso mara den e Protocol di 22 di November 2018.

Caft ta conseha

E espacio cu por desvia di e norma y posiblemente otro normanan di e Laft y e Protocol lo keda determina pa Conseho di Minister di Reino na un otro momento. Pero Conseho di Minister di Reino a tuma decisionnan pa duna e sosten di likides basa riba e conseho di Caft.

Aruba a scoge pa cubri parti di su necesidad di likides cu prestamonan pa medio di bononan di Gobierno cu a bende den Reino y ,ta carga un interes. E decision aki di Aruba tin consecuencia pa e resto di financiamento. Caft a conseha pa permiti cu e saldo di financiamento di Pais Aruba por ta mes grandi na 2020 cu locual a ricibi como sosten financiero di Hulanda hunto cu e prestamonan cu a logra externamente, cu ta inclui gastonan di interes, y e prestamonan di bononan di Gobierno.

Deficit maximo di 808 miyon pa 2020

Basa riba e punto di bista aki, Conseho di Minister di Reino a dicidi pa permiti cu Aruba por yega na un deficit financiero maximo di 808 miyon florin pa henter 2020.

Tambe ta asina cu Aruba, den e di dos cambio di presupuesto 2020 mester inclui un splicacion extenso pa loke ta e diferencia entre e ‘kas-benadering’ y e ‘baten-lasten-benadering,’ E ‘kas-benadering’ ta un sistema caracterisa pa registracion di transaccionnan financiero riba e fecha cu ta haci pago of ta ricibi placa. E ta considera un forma relativamente simpel pa tene administracion. E ‘baten-lasten-benadering’ ta un sistema cu ta brinda un bista mas completo di e informacion financiero, unda ta balora no solamente e fondonan pero tambe e obligacionnan a termino largo.

Inversion maximo di 40 miyon

Basa riba e splicacion aki, Caft lo por bin cu un conseho adicional pa concretisacion di e desviacion maximo permiti pa loke ta e deficit presupuestario pa 2020.

Finalmente, a dicidi pa permiti Aruba e suma maximo di 40 miyon pa inversion di capital pa e aña presupuestario 2020. Esakinan por ta unicamente basa riba e agenda di reforma. Of por usa e fondonan pa e inversionnan pa reemplaso sumamente necesario cu ta rekeri accion urgente.

Aruba mester presenta proposicionnan pa inversionnan asina cu argumentonan adecuado y presenta esakinan pa evaluacion na Caft. Si Aruba ta dicidi pa haci inversion di capital, pues pa genera fondo su mes, e no ta trece ningun obligacion pa Hulanda inscribi pa esakinan.