Conseho di Minister di Reino a aproba acuerdo di condicionnan pa stop recorte di salario

Diabierna 24 di juni mainta, Conseho di Minister di Reino a aproba e condicionnan pa Aruba por yega na stop e recorte di 12.6%. Manera ya a wordo anuncia na mei ultimo, Aruba y Hulanda a yega na un acuerdo bao di cua condicionnan Aruba lo por stop e recorte. E acuerdo aki, a wordo aproba diabierna mainta pa Conseho di Minister di Reino. Aruba awo tin e lista oficial di e condicionnan cu mester cumpli cune.

Den un conferencia di prensa ayera tardi, Prome Minister Evelyn Wever-Croes a duna di conoce cu ya caba Aruba ta hopi avansa den cumplimento di e condicionnan aki.

E prome condicion ta cu e ley di Landsverordening Normering Topinkomens (LNT), e asina yama Wever-Croes Norm, mester wordo aproba pa Parlamento. Dialuna 27 di juni e LNT lo wordo trata den Parlamento. Ta di spera cu Parlamento bay di acuerdo cu esaki pa asina entrante juli proximo, tur empleado cu ta traha pa Gobierno y den fundacionnan cu ta wordo subsidia pa Gobierno, por haya e 5% back riba nan salario.

Contestando pregunta di periodista Sharina Henriquez, si Parlamento como e organo di mas halto tuma e decision pa aumenta e suma maximo of extende e periodo di transicion pa e ley aki, Wever-Croes a contesta cu e ta spera cu si Parlamento bin cu cambio nan ta bon fundamenta. “Cu no por saca e conclusion na Hulanda cu akinan tin un wega of algo asina, y mi no ta duda cu Parlamento ta onderbouwd e bon.”
El a remarca cu tin dos extremo con e cos por cana, sea Hulanda ta bay di acuerdo, pensa ‘e ta bon onderbouwd, nos ta lag’e asina’ of por bay na e otro extremo. “E ora nos ta bay back den tempo, cu Hulanda ta bisa esaki no ta loke nos a palabra, cambie. Por bin problema.” El a bisa cu entre e dos extremo ey nos ta, y e no por anticipa.

Y si Parlamento acepta un ley unda ta acepta e cambionan, e ora nan lo cumpli cu e condicion aki, ‘mi ta kere cu si’.

E di dos condicion ta cu e suma cu lo mester paga mester ta den presupuesto di pais Aruba. Prome Minister a enfatisa cu ya caba e suma a wordo presupuesta. Gobierno ta buscando e fondonan pa compensa e gastonan y tambe mester un conseho di CAFT riba e tema aki. CAFT a duna di conoce cu despues di e reunion di Conseho di Minister di Reino awe, e lo duna su conseho. Ta di spera e ora cu dentro di algun dia por haya e conseho di CAFT.

Contestando pregunta tocante reduccion di gasto di personal den e conferencia di prensa, Wever-Croes a comenta cu esaki ta ‘un topico cu tin nos dividi cu Cft’. “Si di berdad bo kier e reformanan cu ta necesario, anto e ora mester inverti – manera por ehempel den e caso di e autoridad di competencia, nos mester inverti den hende. Awo nan ta inverti den e hende pa e prome dos aña, pero despues nos tin cu tum’e over. Y bo mester inverti den henter un departamento.” Segun Wever-Croes, esey ta ‘un dilema’. El a comenta tambe cu a pesar cu tabatin bon combersacionnan cu Cft, nan no a ricibi aprobacion pa tuma den servicio ‘tur e hende cu bo mester pa e reforma’. El a destaca cu den presupuesto pa 2023 e gastonan di personal a ‘ta mas abao di loke nan mester’ ta segun palabracion, pero ‘no ta structural’.

E di tres condicion ta cu politiconan, minister y parlamentarionan, ta sigui mantene e recorte di 25% riba nan salario. Tanto Gobierno como Parlamento a bay di acuerdo cu esaki.

Un condicion tambe pa pone atencion riba dje ta cu pa Aruba stop e recorte completo, mester ta den cumplimento cu e normanan di e presupuesto. Esaki pa awo no ta relevante pero si lo ta relevante den futuro.

“Cu e decision di Conseho di Minister awe mainta, e prome paso a wordo tuma pa Gobierno stop e recorte. Manera cu Gobierno a anuncia na varios ocasion, e plan ta pa cuminsa paga 5% na tur empleado publico y esnan di fundacionnan cu ta wordo subsidia pa Gobierno entrante juli venidero. Cu e decision di awe, esaki ta mas cerca di wordo realisa”, Prome Minister Evelyn Wever-Croes a duna di conoce.