Durante reunion publico den Parlamento di Aruba cu a tuma luga dialuna 11 di december, a trata e ultimo cambionan na e presupuesto complementario di e ministerionan di aña 2023. Un di e cambionan mas grandi ta e actualisacion di surplus di pais Aruba cu a yega na 1.9%, mas di loke gobierno a anticipa.

Prome Minister, Evelyn Wever-Croes, a contesta pregunta di diferente parlamentario y den esaki, el a duna un actualisacion y splicacion pa loke ta e negociacionnan cu Hulanda y e cambionan den e ley di LAft cu lo drenta na vigor dia 1 di januari 2023.

Riba e tema mes di negociacion cu Hulanda pa loke ta interes mas abao, el a remarca cu mucho trabao no por a wordo haci. Desde su ultimo reunion den Parlamento te cu aworaki tur atencion y tur esfuerso a bay riba e tema di LAft pasobra mester a yega na un acuerdo pa asina e ley por keda cla y drenta na vigor pa e fecha stipula.

Manera a ser splica na varios ocasion caba, na 2015 gobierno di AVP a cera un protocol cu Hulanda cual ta indica cu pa cambia e ley di LAft mester haya aprobacion di Rijksministerraad (Conseho di Minister di Reino) prome.

Prome Minister a splica cu dia 31 di augustus Aruba a manda e ley, cu e cambionan cu nan a propone, pa Hulanda. Den luna di october tabatin hopi negociacion, hopi dialogo cu finalmente a yega na e concepto di ley di LAft cu a manda pa Parlamento di Aruba y aworaki nan ta wardando esaki pasa.

E mandatario a indica, cu desde fin di october, na momento cu e tabata na Hulanda a bin un otro direccion y hunto cu Hulanda a palabra cu ta bay busca un persona neutral cu por guia e proceso un poco miho. El a subraya cu pa Gobierno di Aruba tabata importante pa esaki ta un hende cu por scucha nan argumentonan miho.

“Cada biaha cu Parlamento duna mi argumento, mi ta hiba nan pero mi no ta sinti cu e argumentonan ey ta wordo tuma na serio of ta wordo comprendi of ta wordo tuma na consideracion. E ora nos tambe a bay di acuerdo pa pone un persona intermediario den esaki,” el a remarca.

E persona, el a indica, ta haciendo su trabao. El a papia cu e team di Aruba, el a papia cu e team di Hulanda, el a papia cu Prome Minister Wever-Croes y el a papia cu Secretario di Estado van Huffelen y asina tabatin diferente combersacion. Mientras tanto e partinan a palabra cu e fecha di 1 di december bay push’e pa dilanti pasobra no por a keda cla pa 1 di december y a prefera di hinca mas tempo den e proceso aki.

Pa loke ta e solucion hibrido, e mandatario a splica cu esaki mester wordo elabora y el a recorda cu e compromiso ta cu Parlamento cu nada ta wordo dicidi riba dje sin bin Parlamento prome.

“Riba e parti di negociacion no tin hopi avance y no tin un draft di e solucion hibrido tampoco, ta mas bien den e proceso di purba compronde e posicionnan di otro,” el a agrega.

Tocante e cambionan den LAft, Prome Minister a duna un splicacion di con e proceso a tuma luga. El a splica cu dia 31 di augustus gobierno a manda e cambionan manera cu Aruba ta propone pa Hulanda.

El a sigui splica cu den e prome siman di october tabatin varios negociacion cu Hulanda y Hulanda a indica cu nan kier mira tres cambio y a pone tres condicion nobo riba mesa. Un di e condicionnan aki ta cu nan kier mira e disposicion cu Minister di Finanzas ora cu e reporta riba e maneho financiero, cu e ta duna tambe un reaccion con e ta bay tuma e consehonan di CAft na consideracion. E mandatario a remarca cu no tabatin mucho problema cu e condicion aki y a acept’e sin problema.

E di dos condicion tabata bisa cu den e Memorie van Toelichting mester pone con Aruba ta bay yega na acuerdonan di trabao cu CAft prome cu e cambio di ley di LAft drenta na vigor riba e standard di costo di personal. Prome Minister a indica cu esaki, pa loke ta trata procedura, nan no tin problema pa yega na acuerdonan di trabao prome, pero el a remarca cu e no ta haya mester pone algo den e Memorie van Toelichting, cu ta regla kico ta pasa ora cu e ley drenta na vigor bay pa dilanti y no kico mester a pasa prome cu e ley a drenta na vigor.

El a subraya cu den bienestar di e cooperacion nan a acepta e di dos condicion manera cu Hulanda a pidi.

E di tres punto cu Hulanda tabata kier, e di tres condicion, tabata tocante e proyectonan PPP (Public Private Partnerships). El a splica cu ya caba tabatin un protocol cu Hulanda, cu a wordo cera na 2018, na unda Hulanda a indica cu nan no tabata kier ningun proyecto PPP mas y gobierno tambe tabata di acuerdo den e punto cu Hulanda y a bisa cu nan no ta bay cera ningun PPP.

Prome Minister a indica cu den e cambio di LAft cu nan a manda dia 31 di augustus a Hulanda no tin nada di PPP pasobra tin un palabracion y nan kier tin habri pa wak kico lo por pasa den futuro. Pero como cu no a pone nada di PPP den e version di LAft cu a manda pa Hulanda dia 31 di augustus, Hulanda a bisa cu esey no ta bon.

Hulanda a duna Aruba dos opcion, ta prohibi PPP den e ley of si Aruba kier haci un PPP, ta pidi conseho di CAft y si gobierno no ta di acuerdo cu e conseho di CAft, e ora Rijksministerraad (Conseho di Minister di Reino) ta bay tin e ultimo palabra si por haci e PPP si of no.

“Dunamento di autoridad na Rijksministeraad (Conseho di Minister di Reino) den un landsverorderning ta algo cu no ta aceptable. Raad van Advies a bisa esey caba den e ley di 2015, y ademas mi a splica cu si agrega e cambio ey aworaki, esey si ta un cambio substancial cu mester bay back Raad van Advies cune y no tin tempo pa esaki pasobra ta 1 di januari e ley supuestamente mester pasa,” Prome Minister a indica.

Basa ariba esaki tabatin un discusion largo cu a tuma hopi tempo y na final Aruba a bisa cu nan tin pura cu e ley aki y kier pa e discusion caba pasobra nan kier bay over na negosha pa e interes mas abao. Aruba a informa Hulanda e ora cu Ministerraad (Conseho di Minister) di Aruba, obliga y bao di protesta, a bay di acuerdo cu e prohibicion di PPP den e ley di LAft.