(CNN)—Conseheronan pa e Organisacion Mundial pa Salud (WHO) ta bay considera otro luna si mester añadi ligraglutide—un ingrediente activo den cierto medicacion pa diabetes y obesidad—den su lista di medicacion esencial.
E lista aki, cual ta wordo evalua cada pasa dos aña, ta inclui medicacion “cu ta satisfecha e prioridad pa necesidad di salud di e populacion,” segun WHO. “E meta ta pa tin nan disponibel dentro di e contexto di sistemanan di salud na cada momento, den cantidad adecua den e formanan di dosis apropia, di calidad sigura y na un prijs cu tur hende por paga.”
E lista ta “un guia pa e desaroyo y evaluacion di listanan di medicacion esencial nacional y institucional pa aporta e obtencion y deposito di medicina den sector publico, programanan pa reembolso di medicacion, donacion di medicina y produccion local di medicacion.”
E Comission di Experto pa WHO riba e Seleccion y Uso di Medicina Esencial ta plania pa reuni dia 24 pa 28 di april, pa asina discuti coreccion y evaluacion pa locual ta encera varios medicacion. E peticion pa añadi agonista pa receptor di GLP-1 a bin for di cuatro investigadonan na institucionnan Mericano, incluyendo Yale University y Brigham and Women’s Hospital.
E droganan ta imita e efectonan di un hormoon cu ta regula e apetito (GLP-1), y ta stimula insulina. Esaki ta yuda baha sucu y ta retrasa e paisahe di cuminda den tripa. Liraglutide a wordo desaroya pa trata diabetes, pero aproba na aña 2014 na Merca como un tratamento pa baha peso; su primo mas potente, semaglutide, a wordo aproba pa diabetes desde 2017 y como un tratamento pa obesidad na 2021.
Semaglitude a bira hopi conoci, danki na promocionnan di celebridadnan y riba rednan social. Ta bende esaki bou nomber Ozempic pa diabetes y Wegovy pa bahamento di peso. Estudionan ta sugeri cu semaglutide por yuda hende perde un averahe di 10% pa 15% di nan peso na comienso—mas cu otro medicacion. Pero pasobra esaki ta hopi den demanda, algun version di e medicacion aki ta den deficit na Merca desde aña pasa.
E licencia Mericano riba liraglutide ta bay vence e aña aki, y fabricante di droga, Novo Nordisk, ta bisa cu versionnan generico por ta disponibel pa juni 2024.
E compania no tabata envolvi den e aplicacion pa WHO, segun nan a declara, pero “nos ta ricibi e evaluacion di WHO cu man habri y nos ta emociona pa e decision.”
“Actualmente, no tin medicacion inclui den e lista cu tin e obhetivo specifico di bahamento di peso pa e molester global di obesidad,” e investigadonan a skirbi den nan peticion pa WHO. “Awo e lista ta inclui suplemento mineral pa defectonan di nutricion, pero tambe a describi cu mayoria di e populacion ta biba den “paisnan unda sobrepeso y obesidad ta mata mas hende cu baho peso.”
Conseheronan di WHO ta bay haci recomendacionnan tocante cual droga mester ta inclui den e lista pa e aña aki, cual ta spera di sali september.
“E droga aki en particular tin un cierto historia, pero uso di esaki probablemente no tabata largo suficiente pa por mira esaki riba e Lista di Medicacion Esencial,” segun Dr. Francesco Blanco, ken ta director di nutricion y seguridad di cuminda pa WHO a declara diaranson. “Tambe tin e asunto relata na e costo di e tratamento. Na mesun momento, WHO ta mirando e uso di droga pa reduci peso exceso den e contexto di un evaluacion sistematico pa liñanan di guia pa mucha y adolescentenan. Pues nos ta kere cu e ta ‘un work in progress,’ pero nos ta bay wak kico e comision di e lista ta bay conclui.”
