Ayera departamento di Salubridad Publico (DVG) a divulga mas informacion riba e Novel Coronavirus cu a keda descubri den e localidad Chines di Wuhan y cu aworaki a ocasiona varios victima.
Mientras tanto autoridad di salubridad mundial, manera Organisacion Mundial di Salud (WHO) ta alerta henter mundo tocante e virus aki, cu a cuminsa plama y cu eventualmente e cifra di victimanan lo sigui crece den cuadro di e celebracion di aña nobo Chines, unda nan ciudadanonan bibando den otro paisnan, ta bin celebra e fiesta aki.
Novel Coronavirus.
Consehero medico di DVG, microbiologo Dr. Wilmer Salazar a referi na e virus aki. Segun Salazar, Coronavirus ta un virus ampliamente distribui den mundo y e ta un virus cu ta afecta mas tanto parha exotico y migratorio; pero tambe parha domestico cu nos mes ta cria, ya sea galiña, calacuna, etc.
Sinembargo el a splica cu e virus aki cada cierto tempo ta cambia y esaki ta un caracteristica di dje. Ademas e ta jump di un especie animal pa otro especie animal. E ta normal cu a haya e virus den parha, pero debi na su cambio di structura, e por adapta na otro bestia of animal, por ehempel porco, cabay, etc.
E virus aki ta produci un sorto di griep cerca e animal. Pero den su proceso di cambio of ‘mutacion’ e por jump te hasta cu e ta afecta ser humano. “Y e parti aki ta e problematico cu ta bin cu tur e malesanan respiratorio cu ta afecta e humano,” el a bisa.
Salazar a declara cu e virus aki por ocasiona consecuencia severo cerca e ser humano y te hasta morto. Y unabes cu e virus aki ta infecta ser humano, e ta wordo yama Novel Coronavirus. E ta esun cu actualmente ta afecta comunidad mundial, pero mas tanto na China. Pero nos mester pone atencion riba e desaroyo di e virus aki, pasobra e lo por plama mas den otro paisnan, caminda e lo por bira un epidemia of un pandemia. “Nos mester tene cuidou cune,” Dr. Salazar a bisa.
