ORANJESTAD – Dr. Taraleen Malcolm kende ta consehero di PAHO a bin Aruba unda el a haci un presentacion tocante e NCD of malesanan no transferibel of tambe cualifica como malesanan cronico, kiermen nan ta e malesanan cu no ta wordo transmiti di persona pa persona.

Nan ta malesanan auto immuun, entre mayoria di atake di curason, cancer, diabetes, malesanan cronico di pulmon, Alzheimer, Parkinson, etc. E NCD ta wordo conoci tambe como malesanan cronico di larga duracion.

E a indica cu e problema di NCD ta uno global. Pero specialmente den nos region Caribe e problema aki ta birando mas grandi. Aruba ta un di e tanto paisnan cu ta confronta e problema aki, caminda PAHO ta dunando advies pa atende cu e problematica aki. Nan lo ta dos luna na Aruba pa traha hunto cu e diferente partner di salud pa implementa un Plan Nacional di Prevencion di Salud, caminda e resultadonan lo tuma varios aña. E ta convenci cu e plan aki cu e sosten di tur partner di salud lo pone nan traha hunto cu nos comunidad pa evita e tipo di malesanan aki.

Un 80% di e malesanan cu ta afecta ser humano ta relaciona cu NCD y un gran cantidad di hende ta muriendo pa causa di e malesa aki. Mientras cu mayoria di e malesanan aki bo por preveni nan. Un parti di e problema aki tin di haber cu e falta di consumo di cuminda saludabel, pero e ta resulta costoso na Aruba. Malcolm a indica cu esaki ta wordo yama ‘intervencion costo-efectivo.’

E ta kere cu mester pone atencion pa traha cuminda saludabel y mas accesibel economicamente pa tur hende. Un strategia cu lo por facilita e acceso na cuminda mas saludabel tin di haber cu e bahamento di tax riba e cuminda saludabel; y di otro banda aumenta e tax riba cuminda y productonan no saludabel. Tambe aumenta e tax riba sigaria of tabaco, alcohol, producto cu sucu, etc.

E ta conseha cu e fondonan colecta via e tax aki (nota di redaccion: manera e Sin Tax cu gobierno a introduci) por yuda pa bin cu programanan di prevencion y control pa e comunidad den general. Ya cu e paisnan ta inverti miyones den proceso curativo di malesanan, mientras masha poco ta wordo inverti riba tereno di prevencion.

NCD y plan di prevencion
E malesanan NCD ta e resultado di factornan genetico, fisiologico, ambiental, y di comportacion. E ultimo factor tin di haber cu humamento, falta di movecion of actividad fisico, abuso di alcohol y alimentacion no saludabel ta aumenta e risico pa muri pa cualkier malesa cu ta cay den NCD. Kico mester haci pa atende efectivamente cu e problematica aki?

Malcolm a bisa cu PAHO ta na Aruba pa promove pa nos hendenan cuminsa asumi responsabilidad, y cu nan por cuminsa desaroya cosnan cu ta yuda preveni e tipo di malesa aki.

E ta un malesa cu cada aña ta laga atras 41 miyon di hende cu ta ekivalente na 80% di tur causa di morto globalmente. Pero e sector mas productivo di nos comunidad ta muriendo debi na e tipo di malesanan aki. P’esey Malcolm ta considera relevante pa envolve tur e partnernan di e sector salud. Ya cu e no ta un problema exclusivo di e ministerio di salud, sino cu e diferente sector di nos comunidad ta hunga un rol pa atende strategicamente cu e malesanan cu ta cay bou NCD.

Segun cifra di Organisacion Mundial di Salud (WHO) cada aña 15 miyon hende entre un edad di 30 pa 70 aña ta muri. Un 85% di mortonan aki ta wordo considera prematuro. Entre nan e malesanan cardio-vascular tin e indice mas halto di morto entre e NCD. 17.9 miyon hende ta muri pa causa di malesanan cardio-vascular pa aña. E di dos ta cancer cu ta mata 9 miyon. E di tres ta relaciona cu malesanan cu tin di haber cu halamento di rosea cu ta laga 3.9 miyon di morto atras cada aña; y diabetes 1.6 miyon morto.