Hopi ciudadano ta lubida of nan ta neglisha bay Censo pa registra nan cambio di adres, ora cu nan ta muda pa otro cas of apartamento, sin tene cuenta cu esaki lo por perhudica na nan mes.
Directora di Censo, Sharin Luydens ta bisa cu tur ciudadano tin e obligacion di notifica Censo ora cu nan ta cambia di adres. Ora cu bo ta cambia di adres of ora cu bo ta bay biba afo, of tin cambio di bo status ya sea di matrimonio, bo tin cu bay notifica Censo.
“Manera bo ta cambia adres bo tin cu notific’e. Nos mester tin e adres corecto y bo obligacion ta di bin pa nos haya e adres corecto ey, como un bon ciudadano y segun nos reglanan.”
Cambio adres online
E ta bisa cu tin hende cu no ta haci esaki, pasobra nan ta kere cu esaki ta un perdida di tempo. Pero si nan no lo haci esaki lo tin consecuencia pa e ciudadano mes.
Censo a bin cu cambionan importante pa brinda un miho servicio y nan a modernisa nan plataforma digital. Ta asina –segun sra. Luydens- cu bo por cambia bo adres online bishitando nan website: www.censo.aw.
Si bo ta un persona cu ta biba den un cas/apartamento di huur, bo ta bay cu bo huur contract online y Censo ta cambia bo adres sin problema. Nan ta pidi cierto rekisito pasobra nan mester protege tambe e doño di cas pa no ken cu ta bin registra na su adres.
“Manera nos sa cu hopi biaha tabata pasa; y nos mester bin cu cierto regla pa por proteha e doño di cas”, segun e directora di Censo.
Igualmente e persona cu ta desea bay Censo pa registra nan cambio di adres di biaha e proceso aki ta sosode. E persona mes mester bin Censo, primi un number y den menos cu dies minuut bo ta wordo atendi. Si pa ehempel bo ta huur un apartamento bo mester bin cu bo huur contract, ya cu esaki ta e rekisito principal cu ta wordo exigi. Si e persona ta bay biba cerca un hende, e mester bin cu un carta di e doño di e cas firma y copia di su ID. Y si bo ta bira doño di un cas bo mester presenta bo acta di hipoteca of esun di notario.
Registracion
Igualmente Censo lo bin cu un sistema cu Fondo Desaroyo Aruba (FDA) ta financia, esta ‘Key To Data Distribute Automatic’. E sistema aki ta bay link Censo cu diferente departamento. Entre nan, Inmigracion y Dimas pa hiba un miho control riba e hendenan cu ta bandona nos isla pa mas cu 6 luna of un periodo mas largo, y cu nan no a kita nan nomber fei e registro di Censo.
Nan ta bay manda carta pa un grupo grandi di 11.929 hende cu Censo ta sigur cu nan tin mas cu un aña afo di Aruba. Di e cifra aki nan por wak cu 1.064 di nan a nace na Aruba. Mientras nan tin diferente otro nacionalidad cu ainda ta registra na Censo, a pesar cu aparentemente nan a bandona nos isla of nan ta bibando afo actualmente.
E directora di Censo ta pidi henter comunidad pa yuda Censo realisa efectivamente e proyecto aki pasobra e ta un proyecto na bienestar di e sostenibilidad di nos fondonan social.
