Dialuna PR di DVG, Jurette Croes a informa cu te ainda pa 2’or atardi e cantidad di caso positivo di coronavirus/Covid-19 tabata 50 na Aruba. Pa ayera, e total a alcansa 55 caso.

Na e momento aki tin dos persona cu ta interna den hospital y informacion cu e ta disponi di dje tabata indica cu nan situacion ta stabiel. El a splica cu a pesar cu nan ta interna den hospital y cu nan no ta completamente bon, pero nan no ta den unidad di cuido intensivo y tampoco nan no ta conecta na mashin di hala rosea.

Di e 50 casonan positivo -segun DVG su registro- 21 di nan a wordo contagia door di transmision local. 14 di nan ta caso importa y tin 15 cu ta den investigacion ainda. El a laga sa cu e 21 caso local ta un indicacion cla cu e virus ta plamando entre nos mes na Aruba. “E ta keda nos tambe cu mester stop cu e plamamento di e virus,” el a bisa.

Mientras cu 584 caso a resulta negativo y 634 personanan a wordo getest te na e momento ey. E cifra di personanan den cuarentena e no tabatin e dato actualisa ainda. E edad maximo di e casonan positivo ta 74 aña, mientras cu e edad minimo ta 11 aña.

El a reitera e consehonan pa evita cu e virus por sigui plama localmente: keda na bo cas lo mas posibel te cu dia 20 di april. Y si bo mester sali mester ta lo minimo, solamente pa caso special, por ehempel busca bo salud, botica, alimento. Si bo sali no mishi cu bo wowo, nanishi of cu boca. Laba bo man frecuentemente principalmente ora bo yega bo cas bek y si bo no tin awa cu habon bo por uza hand sanitizer cu alcohol di 60% of mas. Pa esunnan cu ta isola na cas pa motibo cu ta positivo pa Covid-19, DVG ta pidi pa proteha nan mes lo maximo posibel, keda na cas y proteha nos tur.

Preocupacion di comunidad

Un preocupacion cu ta existi tin di haci cu pashent cronico y cu malesa di cancer cu mester bay test na centro di diagnostico. Nan preocupacion ta cu si nan ta negativo na momento cu nan ta bay haci e test, nan ta core e riesgo di wordo contagia pa otro hende cu eventualmente si ta resulta positivo pa Covid-19.

PR di DVG, Jurette Croes a indica cu te aworaki e servicio cu nan ta duna ta, solamente si un persona cu ta un pashent cu no por haya e servicio special pa e wordo transporta su mes na centro di diagnostico. E pashent por yama DVG y informa e departamento aki pa nan por manda un persona pa busk’e y hib’e bek su cas.

Tambe el a contesta algun di e preocupacion cu comunidad a yega di expresa cerca nos manera pakico fast food y drive-thru si por keda habri, mirando cu ta forma rij, y esaki por bira un fuente pa contagia mas hende.

Jurette Croes a bisa cu e posibilidad aki ta minimo. Ya cu si bo ta den un drive-thru, bo ta leu di e persona cu ta duna bo e servicio. E contacto ta hopi minimo y e autonan ta tras di otro for di cierto distancia. Ademas e persona ta paden di auto, dificilmente nan por contagia otro hende pafo, ya cu nan ta den auto.