Ayera tardi ariba rednan social por a tuma nota di noticia tristo cu e personahe conoci na Aruba, Hubert Juby Naar, a fayece.
Sr. Naar no ta un persona desconoci y ta envolvi den e mundo periodistico, di arte, teatro, cultura y farandula aki na Aruba. El a traha como periodista na algun medio local y tabata hopi conoci pa traha como MC na diferente festival di canto, hasta den temporada di carnaval.
Despues di e noticia aki, diferente persona a reacciona riba Facebook expresando nan palabranan di condolencia na famia y amistadnan di Sr. Naar.
“Director, staff y personal di Departamento Di Cultura Aruba ta manda palabranan di mas profundo condolencia na famia y henter pueblo di Aruba pa e perdida aki di un gran baluarte di nos cultura, excelente periodista y Premio Nacional di Teatro na Aruba. Sr. Hubert Juby Naar. Cu Juby descansa na paz y drumi dushi den brasanan di señor,” Departamento di Cultura a publica ariba nan pagina oficial di Facebook.
“Carnaval di Aruba a perde un gran persona cu pa hopi aña tabata skirbi historia di Carnaval y antes tabata MC pa festivalnan di Calypso y Roadmarch Contest. Riba e dia di celebracion Tribute 70 aña Carnival Music, Juby ta despedi di nos. Maestro Juby Danki di a siña nos skirbi e palabranan corecto y recorda nos historia di antes. Condolencia na su famia, coleganan di Matutino Diario y ser kerinan. Cu Baluarte Maestro Hubert Juby Naar su alma descansa eternamente na paz den Reino di Dios,” e conocido periodista Jan Poets a publica.
Di parti di team completo di Bon Dia Aruba nos ta manda palabra di condolencia na famia y amistadnan di Sr. Hubert Juby Naar.
