Ayera mainta comunidad di Aruba a ricibi e tristo noticia cu conocido locutor y propietario di Hit94 FM, Johnny Habibe a ser haya sin bida na su cas.
Habibe tabata conoci como un talentoso locutor, kende a traha na 99.9 y Canal 90, prome cu a ricibi su propio licencia di radio.
A traves di un publicacion riba Facebook e pagina di historia local ‘Nos Historia Nos Herencia’ a publica biografia di Habibe y su trayectoria den e mundo di periodismo y radio.
Habibe a nace na Aruba dia 11 di Februari di 1954. Na aña 1968 cu apenas 14 aña di edad Habibe a cuminsa su carera como locutor na Radio Voz di Aruba.
Na 1970 Habibe a labora na Radio Carina y despues na aña 1976 el a traha cu Radio Kelkboom y despues Radio Caruso Booi. Den decada 80 Habibe tabata un di e locutornan popular na Canal 90.
Na comienso di añanan 90 Habibe a bira director di Radio Galactica 99.9 y despues di Radio Galactica el a bira director y propietario di Hit 94.
Na Television tambe Habibe tabata presentador di e programa “ Soul Train “
Habibe tabata popular pa programacionnan manera “Discolandia”, “Generation 90”, Johnny’s Oldies” y “Aruba’s Top 20 Hit Parade”.
Na nivel internacional Habibe a traha cu Radio RQ 910 y RCR Radio Caracas Radio y tabata coresponsal pa RCTV Radio Caracas Television.
Durante añanan Habibe a sigui diferente curso di periodismo, locucion y maneho di radio.
E tabatin 55 aña den radio difusion y a traves di añanan a logra diferente premio pa su labornan na radio.
Di parti di Bon Dia Aruba ta manda condolencia y hopi forsa pa sernan keri di Johnny Habibe na e momentonan dificil aki. Cu Jhonny sosega na paz.
