Ayera den oranan di atardi a bira conoci e lamentable noticia cu un di e ciudadanonan mas bieu di Aruba, Frans Croes, a fayece siete luna despues di a cumpli su 105 aña di bida.
Segun un relato den portal noticiero NoticiaCla, por a compronde cu “e curason tabata birando zwak y no a wanta mas dialuna.” Sinembargo, e famia tabatin e consuelo cu Frans no a sufri den su ultimo ora, indicando cu “el a bay trankil.” Tambe a indica cu te apenas algun luna atras, Frans ainda tabata hunga ajedrez tur dia.
Frans Croes ta conoci den comunidad como fundador di e agencia di productonan di beyesa, Fa Croes NV. Su esposa, Aura Croes (dfm) tabata un conocido peluquera pa mas di 40 aña, unda a haci cabey pa figuranan importante manera prinses Beatrix di Oranje. Aura Croes a fayece 4 aña pasa.
Frans Croes ta tata di seis yiu, incluyendo e hopi famoso y keri Maybelline Arends Croes, y tambe Sandra Croes kende ta hopi conoci den mundo di deporte.
Segun NoticiaCla a recorda, Frans Croes a cuminsa traha na gobierno. El a traha algun tempo despues pa Lago, pero finalmente a bolbe na gobierno, for di unda el a tuma un retiro trempan y a baha cu pensioen cu edad di 50 aña. Na e momento ey el a habri su negoshi, Fa Croes NV.
Su sernan keri ta recorda Frans Croes como un persona alegre, trankilo, y cu a siña su yiunan balornan manera respet y disciplina. “Nunca mi no a tende mi mayornan papia palabra malo”, e yiu mayo Maybelline ta conta Noticiacla algun luna atras. Tambe a destaca cu na edad di 70 aña el a cuminsa siña toca guitara, y tambe a core su auto tempo cu ya caba e tabatin 100 aña di edad.
Aruba ta recorda un persona ehemplar, exitoso y hopi stima den Frans Croes. Bon Dia Aruba ta manda palabra di condolencia na tur su sernan keri. Cu Frans sosega na paz.
