Un conoci di Gilbert Van Veen kende a pidi pa keda anonimo, ta conta Bon Dia cu sr. Van Veen ainda ta confrontando masha hopi problema mientras cu na inicio su intencion tabata pa yuda. E persona ta splica Bon Dia cu te ainda keto bay hende ta keda tira cacho den e tereno di sr. Van Veen y hende ta keda papia cos sin sa e berdad.
Sr. Gilbert Van Veen tabata tin un Hotel di cacho cu segun e conoci tabata bayendo hopi bon te ora cu hende a cuminsa bandona nan cacho eynan. ”Hende tabata bin cu nan cacho, paga 200 florin di deposito pa laga nan cacho eynan pa tanto dia y despues no tabata bin busca nan mas”, e conoci ta bisa.
A tira culpa riba Gilbert Van Veen di algo cu e no tin di haber cun’e
Eynan caba e persona ta sigui splica cu cos a cuminsa bay hopi fout, anto fuera di tur esaki, un dia un clinica cu tambe ta bay keda sin menciona nomber, a dicidi di culpa sr. Van Veen pa a trece e malesa di Distemper na Aruba cual ta conoci pa mata hopi cacho. ”Desde e momento cu e clinica a menciona cu sr. Van Veen a trece e prome cacho cu Distemper na Aruba, su benta nan a baha drasticamente mientras esaki no tabata berdad. E cacho cu a drenta Aruba cu Distemper a bini for di Curaçao anto el a yega na e clinica pero e no tabata di sr. Van Veen ni tampoco a drenta Aruba via di dje” , e conoci ta splica Bon Dia.
”A tira culpa riba Gilbert siendo cu e no tabata berdad. Mi ta supone cu nan tabata sa cu e cacho a bin for di Curaçao, esaki tabata locual tur hende tabata sa y tabata bisa na prome instante. Mi no a mira pasashi ni papel di e cacho aki pero esaki tabata wordo papia inicialmente cu e cacho a caba di bin for di Curaçao via barco y no a drenta via procedura nan normal, e la bin cu e malesa anto yega na e dokter cu a tira culpa riba Gilbert” , e conoci ta sigui conta Bon Dia.
Gilbert Van Veen a keda sin yudansa
E conoci ta sigui splica cu esaki a causa cu sr. Van Veen su negoshi a cuminsa bay atras anto na e momento ey e no tabata tin forma pa mantene su mes ni e cacho nan mas. El a cuminsa concentra riba duna curso di cacho pa purba di gana placa. E tabata duna les riba lama y luga publico pa motibo cu e no por a haci esaki na su cas mas di berguensa pa con su situacion tabata ta. E conoci ta bisa cu sr. Van Veen no ta un hende slordig, al contrario, semper e ta limpi y semper bon representa.
Hende ta keda papia malo di sr. Van Veen segun e conoci sin sa e berdad tras di tur cos.
”Ta sigui papia malo di dje, ningun hende no ta yud’e, pero sinembargo ta sigui tira y bandona cacho na su cas.
Hopi di e cacho nan aki tabata bay clinica y ta sr. Van Veen ta esun cu tabata paga pa delaster un vacuna y tratamento te unda cu e literalmente no tabata por mas.”
E cacho haya den wea tabata pa wordo crema
E conoci ta splica cu na dado momento e auto di sr. Van Veen a wordo horta y e no tabata tin manera pa bay dera e cacho nan mas mesun lihe cu prome. Serlimar tampoco no tabata piki e cachonan mas na su cas y na dado momento sr. Van Veen no tabata tin ningun luga mas pa bay cu e cacho nan. ”E tin cu warda Sra. Kiki cu no ta tur ora e tabata tin tempo, pues tin ora e cachonan tabata keda tira den saco aki y aya. El a hasta yega asina leu, cu e cacho cu a wordo haya den wea tabata pa wordo crema! E no tabata come bestia manera hopi ta pensa! El a purba di un forma of otro pa deshaci di e bestia anto e no tabata por, mi ta supone na un momento asina bo mente ta cuminsa bira loco berdad pasobra bo no sa kico mas pa haci si ningun hende no kier yuda bo tampoco” , e conoci ta comenta.
E conoci ta splica cu tin un team awo cu ta bay yuda sr. Van Veen y a gara basta cacho rond di su cas na Tanki Flip y plus un pushi cu ningun hende no sa for di unda el a bin. Sr. Van Veen no ta bay piki ningun bestia mas segun su abogado.
”Ta keha cu ta sr. Van Veen a hinca e mama den peliger mientras nan rumannan nunca a haci nada pa yuda e mama tampoco. Ta ironico cu ta culpa sr. Van Veen siendo cu for di 1 aña pasa supuestamente nan tabata di kita e mama di dje pero e no a pasa nunca y awo nan kier pone henter e culpa riba sr. Van Veen mientras ningun hende a yud’a e pober” , e conoci a bisa.
