Ora nos tabata mucha hopi biaha nos tabata cana den mondi pa asina bay piki Shimarucu. Despues di tempo por a tuma nota cu e fruta aki tabata manda un señal na momento cu eta pari. E molester di e bestianan chikito conoci na Aruba como ‘lebelebe’ ta masha hopi. Esey ta duna bo un indicacion cu e mata di Shimarucu ta pariendo.

Hopi di nos tabata come e Shimarucu te hasta ora e ta berde. Na momento cu ta completamente hecho nos ta piki delaster un fruta cu tin na e mata. Sin corda mes cu e mata aki tambe ta haci bo curpa grawata na momento di piki e fruta.

Mata di Shimarucu cu originalmente ta for Yucatan Mexico, Conoci como “Malpighia Emarginata” cual ta su number cientifico. Un famia di “Malphiaceae”. E Shimarucu ta wordo yama tambe manera “Acerola Cherry” Barbados Cherry of West Indian Cherry.

E ta un mata cu nota bira mucho grandi y por yega un grandura 2.5 pa 3 meter. Un mata cu durante aña ta mustra manera seco. Ta wanta secura pa un periodo basta largo y lo bira berde y pari despues di yobida. E mata por crece bon riba tur tipo di suelo. Ta wordo haya tanto na Boneiro y tambe Corsou. E ta un mata cu no tin takinan diki. Takinan ta manera fini y flexible. Durante secura eta perde tur su blachinan. Eta un mata cu ta floria masha liher despues di yobida y despues di floria ta cuminsa duna fruta hopi lihe tambe. Kermen su periodo di floria ta cortico.

E mata despues di tres aña planta ta duna cantidad significante di fruta cora. E frutanan aki ta contene cantidad di vitamina C mas tanto den e fruta cu ta berde ainda. Dos of tres fruta diario ta suficiente pa un persona di 65kg haya vitamina C cu e mester. Ta contene antioxidante. E fruta tin tres simiya triangular parti paden.

E bast ta contene 20 pa 25% di Tannin cu ta wordo uza den industrianan di Cuero. Na Venezuela e takinan flexibel ta wordo uza pa tara stoel y banki. Na paisnan manera Puerto Rico tin plantacionnan grandi di Shimarucu. For di esaki ta produci juice. E juice aki tambe ta wordo uza of combina cu otro juicenan cu tin menos vitamina C pa haci nan mas rico na Vitamina C. E fruta ta wordo uza na momento cu tin diarea. E ta un mata ta wordo multiplica mas facil via di stek.

E fruta Shimarucu ta wordo comi fresco manera e wordo piki na mata.

Na Aruba mata di Shimarucu ta crece den mondi. Un fruta hopi gusta. Bon conoci pa traha “Dushi di Shimarucu” y Jam. Sr. Vicente Kock (dfm) na varios ocasiona a yega di produci Biña di Shimarucu. Awendia tambe por mira personanan para band’i caminda ta piki Shimarucu. Por mira tambe e fruta di Shimarucu a bai riba rednan social caminda personanan ta bende na saco y por mira e ta hopi solicita pa come. E mata por wordo mira for di un distancia debi na su frutanan cora cu ta sobresali entre cualkier otro mata.

Mata di Shimarucu ta obtenibel na Santa Rosa por pasa cumpra esaki si ta desea.