Diasabra ultimo Aruba a conoce su Miss Teen Aruba International 2024 cu a keda den persona di e hoben Jaidyleen Tromp. Den un entrevista cu Bon Dia Aruba despues di su coronacion, Jaidyleen ta conta di su experiencia durante e certamen hubenil di beyesa.
Jaidyleen ta un hoben di 15 aña di edad, el a caba di gradua di Mon Plaisir Collage Mavo y e aña escolar nobo e lo ta bishitando Edu Campus. Apart di gana e corona di embahadora hubenil di beyesa, el a bay cu e titulo di Miss Teen Popular, Miss Teen Interactive, Miss Teen Folklore y Miss Teen Speech.
Jaidyleen su hobby, su pasion y algo cu e tin un talento grandi pe ta baile. “Mi stima tur loke ta baile. Ora mi ta baila, mi ta sintimi hopi felis y baile pa mi ta un momento cu mi por relaha y kita mi mente for di cualkier cos cu ta pasando rond dimi,” el a conta.
E certamen di Miss Teen Aruba International ta dura algun siman prome cu e anochi final mes yega y durante e simannan aki e hobennan ta acudi diferente seminario y actividad. Jaidyleen a conta cu su experiencia participando den e certamen tabata uno super great.
“Mi a siña hopi di e seminario- y lesnan cu nos a haya. Mi a forma hopi amistad nobo tambe cu tur e participantenan. Nos a echt crea un bond super nice,” el a remarca.
Jaidyleen a sigui conta cu su preparacion pa competi den Miss Teen Aruba International a bay hopi bon. Esaki tabata inclui train hopi duro pa a participa, cual e no por a logra sin e apoyo di su famia y preparadornan.
Su inspiracion pa participa den Miss Teen Aruba International a bin di su mes. “Mi eingelijk a inspira mi mes. Semper di chikito mi tabata gusta ta riba stage y haci tur locual cu mi ta gusta. Zowel cu baile y cu certamennan di beyesa,” el a indica.
Pa loke ta su parti faborito di henter e experiencia aki, Jaidyleen ta conta cu e amistadnan cu el a crea cu e otro participantenan ta e parti cu mas el a gusta. “E manera cu nos a echt uni como uno, yuda otro pa hunto nos tur por a bay dilanti tabata mi parti mas faborito,” el a expresa.
Di otro banda el a expresa cu no tabatin un parti menos faborito pe. El a resalta cu tur loke tabatin di haber cu e certamen el a disfruta y “make the best out of it.”
Jaidyleen a sigui conta cu pa loke ta su participacion e no a enfrenta ningun reto. El a enfatisa cu algo cu si e certamen Miss Teen Aruba International a yudele cune ta su self confidence, pa kere mas den su mes y keda pusha su mes pa e por logra tur su metanan.
Pa loke ta trata su plannan pa futuro el a indica cu primordialmente e kier caba su scol y e lo kier bay studia afo y bira un cosmetologo. Y tambe, sin laga afo, e kier sigui participa den mas certamen di beyesa.
Por ultimo Jaidyleen su mensahe pa hubentud di Aruba ta: “Mi mensahe pa nos hoben nan ta pa semper acepta y stima bo mes manera bo ta, pasobra no tin ningun motibo pa compara bo mes cu un otro persona, si nos cada un ta suficiente manera nos ta.”
