E tin semper su agenda completo, organisa te den detaye, pero ademas di pone tur cos riba papel, Juliette van Romondt (49) ta ehecuta tur locual e mester haci. Y sin e dinamismo di Juliette, lo tabata hopi mas dificil pa Leerorkest Aruba por logra tur cos te cu awor.

Juliette van Romondt a nace na Aruba y a crece na Hulanda. Pero “e ta mescos cu un yiu adopta, cu semper kier busca e mama biologico. Semper bo kier bay bek na bo raiz.”

Pues, Juliette, despues di a haci su estudio PABO, y Trabao Social a dicidi pa bolbe Aruba. El a traha na Voogdijraad, pero tambe den sector priva, como gerente di front desk na Marriott, y despues como Trahado Social. Cu ambos mayor bibando na Hulanda, Juliette a bolbe Europa na dos biaha, pero semper a su cas tabata yam’e bek. “Den tur locual mi a haci, tin un liña cora, esta percura cu muchanan tine bon. Mayoria caminda unda mi a traha tabata dirigi riba bienestar di mucha. Na Voogdijraad na Aruba mi a experiencia hopi tristesa. E ta un trabao diferente compara cu e funcion di ‘gezinsvoogd’ na Hulanda, unda ta yuda famianan. Tambe tabata trata di casonan tristo, pero cu ainda por yuda famianan keda hunto.

Leerorkest Aruba

E yamada di Aruba a keda fuerte y bek na Aruba, Juliette tabata kier a traha den e area di prevencion, pa evita cu muchanan ta yega den condicionnan social cu ta rekeri intervencion. Asina el a traha un aña Tra’i Merdia, te ora cu Minister di Educacion Rudy Lampe, kende a pasa e encargo di e entidad pa Prome Minister, a pidi van Romondt si e ta interesa pa yuda un organisacion nobo cu tabata lantando. E organisacion tabata Leerorkest Aruba, un iniciativa di Johnny Croes, pero cu ta un proyecto cu a nace na Hulanda pa sostene e desaroyo di muchanan den Bijlmer en particular. Marco de Souza ta e motor tras di Leerorkest Amsterdam cu a habri hala pa Corsou, Boneiro y Aruba danki na subsidio di Ministerio pa Husticia y Siguridad di Hulanda.

Unabes cu a lanta e grupo di trabao Leerorkest Aruba tabatin mester di un persona pa coordina tur detayenan pa percura cu e proyecto yega mas lihe posibel na muchanan na scol. Y Juliette, cu ta un ‘dinamo’ sin igual a hinca tur su esfuersonan pa organisa locual mester a keda organisa. No solamente mester a mantene contacto entre otro e partidonan, Juliette tabata sigura cu tur hende envolvi tabata sa kico ta nan tarea y ki dia mester tabatin e completa pa asina yega na e meta.

Hiba musica pa muchanan di scol. E prome proceso tabata asisti Director Leerorkest Aruba Johnny Croes y su prome Presidente, difunto Grace Maduro formalisa contactonan cu e docentenan cu mester a yuda den e trayecto unico. “Marco a yuda nos. El a guia nos con pa haci e trabao,” van Romondt a splica. Mientras cu Johnny tabata maneha e traduccion di e material di les di musica pa un proyecto piloto, Juliette tabata encarga cu e logistica, pa sigura cu tur partido envolvi sa kico ta nan trabao. “Mi a haya hopi ayudo di Marco, pa cual mi ta hopi gradicido.”

Asina, den un tempo record a organisa tayernan pa docentenan di Corsou, Boneiro y Aruba bira familiar cu e metodo di Leerorkest. Y un luna despues, e pandemia a bati porta. Mesora e team di Aruba a haci uso di su creatividad, y a pasa pa medio digital. Johnny Croes a crea un studio completo na su cas, y Jaderick Croes y Juliette a uni e grabacionnan pa sigura cu e lesnan ta sigui, den forma digital.

Musica ta pa structura

“Mi no ta musical. Mi ta gusta musica si. Y como Trahado Social mi sa con importante musica ta pa desaroyo di mucha. Ma traha tambe cu muchanan autista, y mi tabata sa cu musica ta yuda muchanan conecta cu otro. Pues mi tabata hopi contento cu a puntra mi pa yuda den un proyecto cu apenas tabata cuminsando. E ta particularmente bunita pasobra e ora por hinca

E aspecto preventivo pa mucha ta sinta hopi cerca di mi y e bunita di Leerorkest ta cu tur mucha por participa, si nan tin talento specifico of no, pasobra e meta ta pa nan haya e sentido cu nan ta pertenece, cu nan participacion ta aprecia y cu nan ta duna sosten na e grupo, e colectivo, pa hunto produci algo cu ta creativo, alegre y bunita. “Hasta si ta for di tono, bo ta cu asina hopi otro cu no ta tende e tono robes mes.”

E forma con Juliette ta traha ta pa wak dilanti, no unda ta para awor sino kico mester bin, unda kier ta den futuro y si e obhetivo ta algo cu por logra. “Nos por soña hopi, kier hopi, pero nos mester percura cu e no ta bira un problema. Pero mi ta haya e trabao masha dushi mes pa organisa y pa coordina, percura pa e structura. Mi lema ta ‘haci loke bo ta bisa y bisa kico bo ta haci..’”

A pesar cu e trabao ta hopi, ta rekeri hasta mas ora cu tin programa den su trabao, Juliette ta hopi contento di por forma parti di Leerorkest Aruba. “E structura ta trece calmo. Basa riba mi experiencia cu muchanan autista, mi sa cu e ta traha. Mi yiu por ehempel, aunke no ta autista, mi ta ripara cu structura, bon organisacion y sa kico ta na caminda ta traha bon. Esey ta conta mescos pa muchanan di Leerorkest Aruba.”

Motivacion

No tin duda cu e team di Leerorkest Aruba ta hendenan cu tin amor pa mucha. Un amor cu ta haci posibel cu nan por dedica oranan ta desempaca instrumentonan cu ta yega for di Hulanda, core parti nan rond pa scolnan cu ta na beurt y despues bay e scolnan pa wak con e lesnan ta progresa. “Nos ta traha pa e alegria di e muchanan, y nos ta mira cu nan por participa. Mi a bisa Minister tambe, cu e momento cu e muchanan ta habri e estuche di nan instrumento, mi ta bira hopi emocional. Ta muchanan cu nunca a mira cierto instrumento y ta hopi special pa por experiencia esaki.

Den otro palabra, e trabao cu Leerorkest Aruba por ta pisa y ta rekeri hopi organisacion, pero e ta permiti Juliette van Romondt tambe rebiba e alegria di infancia. Y ta e alegria aki ta locual ta motiv’e tur momento.