Di un mucha inkieto cu tabata fada cu tur cos pa un di e fotografonan profesional mas pidi na Aruba. Ta papia aki di Ayrton Tromp (24) cu danki na e ‘no’ di su mayornan, a logra aprecia kico tur e por a logra riba su mes. For di fotografo di naturalesa te na fotografo di Su Mahestad Rey Willem-Alexander y su casa, su Mahestad Reina Maxima. Y tur den un periodo di apenas 10 aña.
Ayrton semper tabata artistico, pero super distrai. Cu su 11 aña caba el a ripara cu e tabata por traha miho cu imagen. Y cu su 14 aña, el a expresa na su mayornan cu e tabata kier a purba fotografia. Pero, pa motibo cu nunca Ayrton tabata consistente den locual e tabata cuminza, su mayornan no kier a complace y sigur no pa inverti den un camara cu no ta algo barata. Consecuentemente, e hoben di 14 a dicidi pa bay na e supermercado banda di su cas pa asina haya un trabao den tempo di vakantie y pa simannan tabata yena saco di comestible. Asina cu el a acumula 1,500 florin, Ayrton a bay Boolchand’s y e fotografo a nace.
“Mi tabatin hopi berguensa di papia di locual m’a haci. Na prome instante, mi tabata influencia pa amigonan y ta mira con amigonan tabata haya e telefon mas nobo, e computer mas nobo. Pero mi mayornan no tabata kier a cumpra e camara, pasobra ami tabata e yiu cu no a wanta na nada. Despues di par di luna di haci algo, Ayrton a fada. Y Tromp awor ta compronde pasobra e tabata fada cu tur cos cu e tabata haci prome.
El a cuminza ta saca potret di mata, flor, bestia, y tur locual ta rond di dje na cas. Y usando Facebook, e tabata comparti su potretnan cu a capta atencion mesora. “Poco dia pasa un hende a puntra mi ki dia mi ta bay saca potret di naturalesa atrobe,” el a comenta (red. e dia di e entrevista, Ayrton a publica algun potret di naturalesa, cu e comentario cu el a dicidi di bay back na su raiz, pa un rato).
Awor aki hopi di su energia ta pa su trabao. Fotografia por ta su hobby, pero tambe su responsabilidad awor. Y locual semper a keda for di principio, ta su mesun estilo. “Esnan cu conoce mi sa cu nunca mi kier ta mescos cu otro. Mi kier algo diferente. Mi kier ta apart. Nunca mi kier a imita otro. Mi por bisa cu mi por a bin cu un manera di presenta un imagen den forma diferente.” Aunke e tabata un risico, el a traha pa Ayrton, pasobra su estilo a habri porta p’e. “Mi a logra cu hende ta reconoce mi potretnan, sin cu mi mester pone mi nomber. Pa mi e ta straño, pasobra mi ta djis haci algo cu mi ta gusta. Logico mi ta contento, pero mi no sa con mi a logra. Mi ta kere cu ta pasobra mi ta realmente gusta fotografia y mi ta duna 100 porciento di mi mes den dje.”
Y no a tarda pa e hoben fotografo di naturalesa, haya oportunidad comercial. E tabata bay MAVO ora cu el a haya su prome oferta pa un trabao comercial. “Mi tabatin 16, den examen y mi mama tabata yuda mi contesta e hendenan, pa bisa nan cu e momento ey mi mester a concentra riba scol.” Pero e oportunidadnan no a para y unabes na EPI, como hoben di 17, Ayrton a cuminza combina scol y trabao. Cada ora liber tabata bay pa haci trabao di fotografia, pa revistanan, te hasta pa ATA.
Ayrton hasta tabata invita pa saca potret ora di Bishita Real. “Mi a spijbel pa por a haci e trabao. E otro studiantenan tabata puntra mi si mi tabata sa kico mi ta haci, pasobra EPI ta rekeri presencia na scol, cu ta conta pa punto. Y riba dje, mi mama mes tabata docente na EPI.” Pero asina mes, Tromp a tuma e riesgo, y a haya oportunidad di documenta e bishita di Willem Alexander y Maxima, te cu el a haya su mes ta presenta e Pareha Real un regalo di nan bishita na Aruba. “Mi tabata haci locual realmente mi tabata gusta. Y corda mi no tabatin ni rijbewijs, dus mi mester a cana bay pa e fotoshoots.”
Dia cu Ayrton a cumpli 18 aña, e tabata sa cu e mester a lanta su compania. Y Camara di Comercio no a kere den dje y tabata kier pa el a pone e compania den nomber di su mama. Pero e hoben tabata determina, pasobra sin un registro di compania di Camara di Comercio e no tabata por a tuma trabao. Pero, e institucion a indica cu e mester tin 10 mil florin cash riba su cuenta pa por habri su compania. “Awor mi sa cu esey no tabata necesario. Pero mi mester a warda un par di luna te ora m’a acumula 10 mil florin y asina a logra habri mi mesun compania.”
Y den e seis añanan cu a sigui, Ayrton a expande su portfolio cu potretnan di bruid, y otro evento. El a haya hopi guia di otro fotografonan profesional, kendenan e mes ta admira hopi, entre otro Luis Mejia, Crooze Photographers y Kenneth Theysen. Pero semper cu su mesun estilo, creando un lazo cu clientenan. “Mi kier conoce mi clientenan, mi kier tene mi trabao ‘fun.’” Pasobra logra un calidad y reputacion ta facil, pasobra ta esey ta e talento y gana. Pero e trabao ta rekeri contacto, cumpli cu cliente y entrega un bon producto. “E etica di trabao ta sumamente importante. Tur cos mester bay netjes.”
Y e hoben cu tabata fada cu tur cos a haya su ritmo. Un profesion cu tin su riesgo, a bira su anker, cu a yud’e surpasa hasta e tempo di pandemia, ora cu no tabatin trabao of seguridad. Y su mama? E ta su sostenedor mas grandi y e ta contento cu su yiu mes a traha pa su mesun cosnan. Door di esey, Ayrton ta aprecia e balor pa su trabao. “Tur cos cu mi tin awe, ta mi mes a traha p’e. Mi mayornan mester a pone mi traha pa mi cosnan. Mi mama ta super orguyoso.”
Y vision pa futuro ta pa haya mas oportunidad pa explora tur skina di mundo y sigui conoce mas cultura, otro pais. “Practicamente mi kier biaha y saca potret.”
