Connected Capital LLP: e financiador cu Aruba mester?

ORANJESTAD – Den rueda di prensa di 24 di april, ministro encarga cu Infrastructura a referi na e publicacion di Bon Dia Aruba di 14 di maart 2019, tocante e director Venezolano di Three Rivers Real Estate NV.

E reputacion di e persona ey riba internet no ta di gaba, como Chavista reconoci, pero no ta e aspecto principal di nos trabao investigativo. Esey ta e otro articulo publica simultaneamente, cu ta trata e compania Britanico cu lo mester provee e capital pa construccion di e hotel na Sero Colorado. Como cu nos tin e impresion, di loke nos ta mira ta aparece den prensa local, cu ta enfoca solamente riba e caso di e director, y no di unda e capital pa inverti mester bin, nos a tuma e decision di publica e articulo tocante e compania financiador un biaha mas, cu tabatin e titulo cu ta aparece aki riba.

Den e articulo acompañante nos a ilumina e caso di e empesario/intermediario Colmenter Guzman. Den e articulo aki atencion pa otro aspecto di e caso di e proyecto di hotel na Sero Colorado, cu ta e empresa financiador. A menciona un compania Ingles cu lo ta responsable pa e financiamento di e proyecto di Three Rivers Real Estate NV, cual lo ta Connected Capital, estableci na: 3rd Floor, Lansdowne House 57 Berkeley Square London W1J 6ER, Reino Uni.

Nos a haci nos propio background check riba e compania aki. Connected Capital LLP, manera e nomber ta bisa, ta un ‘Limited Liability Partnership’. Kico esey ta exactamente segun e legislacion Britanico di e momento aki? Contrario na e Limited Liability Partnership antiguo, cu tabata solamente un partnership entre persona natural, awendia diferente tipo di compania, manera un ‘corporation’, un otro LLP, etc., tur por ta partner den un LLP. Sin embargo, ta keda asina, mescos den e situacion anterior, cu e miembronan no tin responsabilidad pa debe di e partnership mas leu cu loke nan a contribui na e LLP, of cu nan a compromete di inverti. Tambe e miembro individual ta responsable como persona pa su asuntonan fiscal, y no pa esun di e LLP. E LLP no conoce ni director ni accionista, pero si por lo menos dos ‘miembro designa’ cu ta responsable pa gerencia di e partnership, y cu bao di cierto condicion por ta responsable pa debe di e partnership.

Den caso di e compania aki, e tin actualmente dos miembro designa, cu ta Harmeet Singh, residencia na Reino Uni, y Preeti Hollmann, residencia na Inglatera. Tabata miembro designa tambe un Jose Luis Colmenter Guzman, nombra dia 04 di juni 2014, na inicio di e compania, pero cu a retira como miembro designa dia 19 di september 2017. Tambe a retira Rupert Hope, residencia na Merca (1 di juli 2016), y nombra na inicio na 2014 tambe.

Algun splicacion di e ‘miembro designa’: esaki ta un persona cu a keda apunta pa un partner –desconoci – cu no kier duna di conoce ken e ta. Esaki ta un bon manera pa empresa o persona natural sconde tras di otro persona, contrario na e situacion den un ‘NV’ of ‘corporation’, unda tanto director como accionista tin nan dato deposita obligatoriamente den registro publico. Registro publico den e caso di e LLP Britanico ta menciona solamente nomber di e ‘miembro designa’.

Interesante ta cu e compania, pa loke ta su obligacion pa deposita su cuentanan anual, a solicita pa fin di e aña fiscal 2015-2016 e derecho pa no mester deposita cuenta anual extenso, pero bao di e cualficacion di ‘empresa chikito’ (small business) ta haya exencion di entrega cuenta anual completo (articulo 477 di e Companies Act 2006). Aunke esaki no ta inusual y hasta perfectamente permisible pa ley, pero si ta contradictorio cu un compania cu ta purba crea e imagen di ta un organismo o fondo di inversion fuerte y confiable, cu ta en busca di cliente comercial, pa yuda nan cu nan financiamento. Pa fin di aña fiscal 2016- 2017, e total di interes financiero di e miembronan riba e balance sheet di e compania tabata £35.193 (US$ 46.806).

E situacion financiero di Connected Capital ta trece varios pregunta, entre otro, si e compania ta solamente un intermediario financiero. Den e caso ey, e pregunta ta ken ta e financistanan berdadero tras di e deal aki.