Mañan 20 di juli e comunidad Colombiano lo celebra e di 209 aniversario di independencia di nan pais. E biaha aki pa conmemora e fecha historico y patriotico aki lo celebra mañan un Santo Sacrificio di Misa na Spaño pa 8’or di mainta na Misa Birgen di Fatima na Dakota.
E biaha aki na luga di un acto protocolario y ofrenda floral riba Plaza Simon Bolivar, nan a dicidi di celebra un acto religioso, unda a wordo invita nos autoridadnan local y cuerpo diplomatico, y logicamente e comunidad den general, y di forma special e comunidad Colombiano.
Durante e ceremonia religioso lo tin diferente ofrenda y e lo conta cu asistencia di muchanan y hobennan cu lo exhibi bandera di diferente pais. Tambe lo reparti un sorto di recordatorio pa tur esunnan presente. E ta un forma pa e pastoor Joseph di Misa Birgen di Fatima bendiciona e generacion nobo. E misa lo conta cu presencia di nan coro y tambe di e solista Gloria Vegaz kende lo canta e himno di Colombia.
Na final lo tin un desayuno al estilo Colombiano manera pan de bono, buñuelo, empanada, caribañolas, papa rellena, etc.. totalmente gratis pa e publico presente dilanti di e misa.
Tambe lo tin presencia di un cantante Colombiano di taya internacional, Omar Antonio Hernandez kende a ser invita specialmente pa celebra Dia di Colombia na Aruba. E lo canta un variedad di tema musical di e folklore Colombiano. E actividad aki ta wordo organisa pa e Consulado di Colombia na Aruba.
