(AP) — Congreso Mericano diaranson a autorisa e investigacion di huicio politico (impeachment) riba presidente Joe Biden, cu tur Republicano uniendo tras di e proceso politico a pesar di preocupacion entre algun den e partido cu e investigacion ainda no a produci evidencia di mal conducta di e presidente.
E voto 221-212 riba linea di partido a pone henter e conferencia Republicano den Congreso den sosten di un proceso di impeachment cu por resulta den e castigo mas grandi pa un presidente: castigo pa loke Constitucion ta describi como “crimen halto y mal conducta” cu por conduci na retiro for di su cargo si e keda condena den un huicio den Senado.
Biden, den un declaracion inusual tocante e esfuerso di impeachment, a cuestiona e prioridadnan di Republicanonan den Congreso na momento di busca un investigacion riba dje y su famia.
Autorisando e investigacion di varios luna ta sigura cu e investigacion di impeachment ta extende den 2024, ora cu Biden ta bay ta campañando pa reeleccion y ta parce probable di enfrenta ex-presidente Donald Trump – kende dos biaha a pasa huicio politico den su tempo den Cas Blanco. Trump a pusha su aliadonan Republicano den Congreso pa move lihe pa impeach Biden.
E decision pa tene un voto a yega mientras lider di Congreso, Mike Johnson y su team ta enfrenta presion aumentando pa mustra progreso den loke a bira un investigacion di casi un aña centra riba e tratonan comercial di miembronan di famia di Biden. Mientras nan investigacion a lanta pregunta riba etica, no tin evidencia cu Biden a actua coruptamente of a acepta soborno den su rol actual of den su posicion anterior como vice-presidente.
Democratanan den Congreso a para den oposicion uni contra e resolucion di investigacion diaranson, yamando e un farsa perpetra pa esnan otro banda pa busca vengansa pa e dos impeachment contra Trump.
Pero lidernan Republicano a haci e caso den simannan recien cu e resolucion ta solamente un stap den e proceso, no un decision pa impeach Biden.
