Durante ultimo añanan, sindicato FTA a abstene di participa den cualkier manifestacion, specialmente esunnan cu por tin un color politico. Diabierna ultimo, presidente di FTA, Hubert Dirksz tabata presente pa sostene e manifestacion contra abuso sexual di mucha, cu Yury Bracho a organisa pa entrega un manifiesto na parlamento y gobierno. Sinembargo, FTA no a haci un yamado publico na su miembronan pa participa den dje.
Sindicalista Dirksz a laga sa cu di parti di FTA a haya e peticion di Yury Bracho, caminda el a haya espacio pa papia cu nan congreso. Ta asina cu congreso di FTA, unda ta participa tur nan delegadonan cu ta e autoridad maximo di e organisacion sindical aki, a haci un cantidad di pregunta rond di e manifestacion en cuestion. Y tambe nan a duna nan opinion, unda nan tur por a reconoce cu e problema di abuso sexual di mucha, y cualkier sorto di abuso ariba su mes, ta un problema serio na Aruba. Tambe e problema social ta uno asina grandi cu adictonan cayehero, etc.
“E situacion social ta birando hopi dificil na Aruba cu mester di atencion,” el a declara. Segun Dirksz, e problema aki ta demanda cu mester bini hunto y traha riba e problema aki, ya cu na final nos tur ta keda biba akinan. Ademas ora problema social ta cuminsa afecta un di nos, dolor so e ta causa. Y si e ta sigui scala, e no ta bay afecta directamente e famia, sino cu e ta bay afecta nos calidad di bida y comportacion, cu lo tin su efecto riba e parti economico tambe.
FTA ta den e posicion cu decisionnan mester wordo tuma tanto na nivel di parlamento y di gobierno awor, y no laga sigui prolonga esaki pa despues. “Tardando of poniendo un cos un banda y keda extende, mas pio so e problema ta bira.”
E sindicalista ta considera cu segun prioridad, esaki ta e momento pa atende cu e problemanan social, cu ta hopi serio. Un di nan tin di haber cu abuso sexual di mucha, cu ta uno alarmante y –segun presidente di FTA- no ta na su luga pa sigui tolera esaki y cera wowo. “E problema t’ey, ban atende cune,” el a bisa
