(NTN24) – Diaranson ultimo, Congreso di El Salvador a anuncia cu gangnan cu lo ta deteni ta bay keda husga colectivamente, loke ta bay conduci cu gruponan di por lo menos 900 preso lo enfrenta e mesun huicio.
E norma ta ordena “e sometimento di varios persona acusa na un proceso penal so pa su pertenencia na un mesun structura terorista of agrupacion ilicito y cu a ser captura den vigencia di e regimen di excepcion,” segun e decreto aproba ta indica.
“No tin nada similar den historia na mundo cu loke nos ta enfrentando aworaki. Ta mas di 900 acusacion pa grupo loke e decreto transitorio aki ta presenta,” minister di Siguridad Gustavo Villatoro a señala. E “disposicion transitorio” aki a keda aproba cu 67 voto di diputadonan alia na presidente Nayib Bukele.
E norma, cu a nace for di un iniciativa di Bukele, tambe ta establece cu e detenidonan bao e regimen di excepcion por permanece preso hasta 24 luna prome cu Fiscalia lo hiba nan huicio of lo ordena nan liberacion.
Despues di e decision, e vice-presidente di Congreso, Guiellermo Gallegos, a splica “cu e disposicion di Fiscalia lo no mester presenta pruebanan individual contra e gangnan den un proceso hudicial penal.”
“Esey ta bay facilita na Fiscalia y tribunalnan e husgamento di e delincuentenan gangnan.” E legislado a bisa. Ademas, Fiscalia lo por “utilisa den un proceso hudicial e mesun elementonan di prueba contra un grupo di gangnan ora esakinan ta pertenece na e mesun structura ilicito, operando den mesun zona geografico of si nan a participa den mesun hecho delictivo.”
Di su parti, e diputado opositor Jaime Guevara, a critica e norma nobo aki ora ta considera cu “ta busca resolve so e collapse cu sistema hudicial tin pa e miles di captura di e regimen di excepcion,” cu ta suma casi 72.000.
