(DW) – Camara di Representante di Colombia den un ultimo debate cu a tuma luga diabierna di siman pasa, a aproba e reforma di sistema di pension proponi pa Gobierno, cu awor ta bay pasa pa sancion presidencial pa por bira un ley.

E iniciativa aki, un di e reforma principal di presidente Gustavo Petro, a haya 88 voto na fabor y 23 den contra, segun Camara di Representante a informa.

“Un gran noticia pa e pueblo Colombiano. Colombia ta avansa pa un behes digno y decente! A ser aproba e reforma pensional den Camara di Representante. Pa un sistema di proteccion di behes, invalidez of morto,” Ministerio di Labor, cu a elabora y a haci impulso di e iniciativa aki a destaca riba e red social X.

Esaki ta e prome di e reformanan gubernamental cu Congreso ta aproba den actual legislatura cu ta culmina dia 20 di juni, reforma di labor ta sigui den proceso, di salud a zink na maart y di educacion te ainda ta falta un debate pa bira ley.

E obhetivo di e proyecto ta pa mantene e edad di hubilacion den 57 aña pa hende muhe y 62 aña pa hende homber, ta amplia e sistema pa tur por haya beneficio di recursonan incluyendo sin nan no a aporta lo suficiente den salarionan.

E proyecto tin cuatro pilar, esun prome di e cual ta bay beneficia na dos miyon y mei di adulto mayor cu no a contribui nunca of a horta nan placa y cu awendia tin mas di 65 aña. E di dos ta admiti esnan cu a contribui den mayor parti di nan bida, pero cu esey no ta logra e pension. Pa e motibo ey nan ta bay ricibi un renta pensional conforma pa loke nan a aporta na fondo publico Colpensiones y un subsidio di hasta 30% cu Estado Colombiano ta bay otorga. E di tres pilar ta pa esnan cu ta aporta cu entre un y hasta 2 of 3 salario minimo mensual, cu ta Colpensiones. Y di ultimo pilar ta pa esnan cu gana mas di 2 of 3 salario minimo, pa nan ta bay garantisa e posibilidad di contribui na excedente den fondo priva di pension di nan eleccion y segun nan nivel di entrada.

Pero congresistanan di diferente partido a critica e forma den cual e proyecto a ser aproba, pa motibo cu Camara no a debati e contenido, sino cu a vota pa e mesun proposicion cu Senado a aproba.

P’esey, e reforma pensional no lo mester concilia sino cu pasa directamente na sancion presidencial pa bira ley.

E representante Caterine Juvinao, di partido Alianza Verde, a afirma cu “nan ta obliga nos vota cu un proposicion so presenta pa pacto Historico, pa congresistanan gobiernista, pa no debati e reforma na Camara, sino pa nos simplemente vota pa e texto cu Senado a aproba.”

“Di aproba e proposicion aki (manera a sucede) e debate ta caba. E ta manera Camara a debati y vota si na tur loke Senado a bisa y ya, e reforma pensional ta keda aproba,” Juvinao a bisa den un video transmiti riba su rednan social.