(ElTiempo).- E participacion den politica di e ex-guerrilleronan di Farc, e tema mas polemico di e husticia pa e actornan di e conflicto arma, y cu a ser ataca pa varios sector politico, a keda resolvi dialuna pasa den Congreso.
E hecho a tuma lugar den un sesion den cual mayoria a acompaña gobierno den gran parti di e 163 articulo di e proyecto di ley cu ta reglamenta e ‘Jurisdicción para la Paz’ (JEP), esun mas importante pa implementacion di e acuerdo di paz.
E iniciativa aki ta fiha e reglanan cu cual lo huzga e ex-combatiente y militarnan cu a comete delito di lesa humanidad y crimen di guera den e conflicto arma.
A keda falta algun articulo cu tin di haci, entre otro tema, cu e condicionnan cu esnan cu bay den e sistema mester cumpli cune pa por keda aden.
Den un discusion cortico, cu no a tuma mas di un ora, Camara di Representante a determina cu e ex-combatientenan por ser elegi den Congreso, tuma y mantene nan asiento, cumpliendo cu algun condicion.
Desde cu a acorda e punto aki entre e delegacionnan di gobierno y di Farc, na La Habana, e asunto a lanta hopi stof entre varios partido politico.
Aunke expertonan a bisa reiteradamente cu e participacion den politica di e ex-combatientenan cu ta somete nan mes na un proceso di paz ta un di e imperativonan, na Colombia tabatin varios voz cu a lanta contra esaki.
Ex-presidente Uribe y su base politico tabata e principal opositor di e acuerdo di paz, a trata di introduci obstaculo na e posibilidad aki, di varios manera.
Incluso, un di e cambionan cu e Centro Democrático tabata impulsa ta pa modifica loke a acorda na Cuba, y ta enfoca riba limita e participacion den politica di esnan cu a bandona arma y a dicidi tuma e caminda di democracia.
Otro voznan den Congreso, Cambio Radical y Partido Conservador, a suma nan mes na e protesta aki. Apesar di e bientonan en contra, gobierno a logra cu e mayoria di e Camara di Representante a apoya e posibilidad aki, y prueba di esaki tabata e aplastante votacion na fabor: 88 voto na fabor y solamente 7 contra.
