E siman aki Congreso di Colombia te cu diahuebs ta den un proceso di ‘fast track’ pa caba cu loke falta ainda pa aproba e cuadro legal pa e implementacion di e acuerdo di paz cu Farc y e debate electoral pa 2018.

Esaki lo ta casi un careda di velocidad pa cual e congresistanan tin solamente 96 desde ayera.
Den e proceso rapido lo establece e cuadro huridico den cual Farc lo por move como partido politico.

Presidente Juan Manuel Santos a haci varios pedido na e congresistanan pa aproba e iniciativanan aki.
Tin ocho proyecto clave pa e proceso di paz cu mester aproba ainda, pero gobierno a bisa cu nan ta satisfecho si por aproba tres di nan: esun cu ta aproba e hurisdiccion pa Paz, esun cu ta crea e circunscripcion special di paz y e reforma politico.

Aunke e parlamento por sigui traha riba normanan di e tema, e fin di e periodo di legislatura (16 di december) y e proceso electoral den cual lo elegi un Congreso nobo (maart 2018) ta pone hopi incertidumbre riba loke ta bin ainda den e sentido ey.

Congreso mester defini e siman aki, ‘de una vez por todas’, e cuadro di e Jurisdiccion Special pa Paz (JEP), cu tabata obheto di e discusionnan bastante compleho.

E proyecto (JEP) falta solamente e ultimo debate den Camara di Representante, pero e postura di oposicion lidera pa Centro Democratico (CD) y Cambio Radical, cu respaldo di su lidernan maximo Alvaro Uribe y Germán Vargas, cu ta disputa e linea mas duro riba e tema aki, ainda ta mantene incertidumbre encuanto algun aspecto di e proyecto.

Aunke cu Corte Constitucional, den su sentencia recien tocante e acto legislativo cu a crea e hurisdiccion aki a parce di habri caminda pa e proyecto den asunto manera e participacion den politica di e ex-combatientenan acusa di delito grave, Centro Democrático y Cambio Radical ta resisti contra votacion riba e iniciativa.

Seguramente e proyecto lo ser aproba, ya cu gobierno tin lealtad di otro sectornan politico, pero e postura radical di Uribe y Vargas y nan partido por pone na riesgo cierto aspecto di husticia na cual e protagonistanan di e conflicto arma mester somete.