Diahuebs ultimo, prome minister Evelyn Wever-Croes a trece dilanti e tema di Algemene Rekenkamer den un conferencia di prensa di prensa di diabierna ultimo pa asina ey tambe informa comunidad tocante e congreso CAROSAI.

Prome minister a declara cu e colegio halto di Estado cu ta encarga cu e trabao importante di asisti parlamento den nan tareanan di controla gobierno ta hopi importante pa Algemene Rekenkamer ta consisti di personanan cualifica y prepara pa haci investigacionnan necesario sea ora el a wordo pidi of di propio iniciativa pa duna un opinion di entre otro, cuentanan anual di gobierno pero tambe proyectonan y otro tipo di desaroyonan.

E aña aki, Algemene Rekenkamer ta celebrando 35 aña unda cu prome minister a destaca cu “e ta un pilar fundamental di e democracia di nos pais, bo no por imagina papia di democracia si bo no tin un Algemene Rekenkamer den bo pais”, el a señala.

Un di e metanan di e gabinete manera prome minister a comenta ta pa fortifica e pilar aki, fortifica e instituto alto di estado aki mas tanto posibel pa asina tambe por fortifica e sistema “nos orden democratico cu nos tin na nos pais”.

Pa esaki, nan a institui un comision cu ta yudando gobierno den e fortificacion aki riba diferente pilar, a cuminsa den ombudsman, a traha riba Raad van Advies cu pronto lo wordo trata na parlamento, ta sigui cu parlamento mes y despues cu Algemene Rekenkamer, el a bisa cu “e meta ta pa independisa e institutonan aki mas tanto cu ta posibel, fortificando nan pa asina nan por haci e trabao importante di ‘checks and balances’cu pueblo di Aruba ta conta riba dje”.

Algemene Rekenkamer tambe ta consisti di miembronan nobo como por ehemplo, Xiomara-Croes Williams, ken tin 30 aña di experiencia riba e tereno financiero tanto den sector priva como den sector publico, Christofer Lake cu tambe tin estudio den Business Economics, Rick Samuels un abogado conoci na Aruba unda cu nan tres ta forma e colegio di Algemene Rekenkamer y recientemente Xiomara-Croes Williams a wordo proponi pa lidera como presidente e colegio aki.

Den e celebracion di 35 aña, Aruba ta sede di e conferencia internacional di institutonan manera Algemene Rekenkamer den Caribe cu ta yama ‘CAROSAI’ caminda a cuminsa ayera diadomingo y lo caba dia 19 di mei, prome minister tambe a bisa cu Aruba a haya tambe e presidencia di e congreso aki.

Di su parti, Xiomara-Croes Williams ken ta fungi como presidente di e instituto aki a informa cu e congreso aki Caribbean Organisation of Supreme Audit Institutions unda cu Aruba ta miembro di dje hunto cu otro 22 pais den region y ta afilia na INTOSAI e cual ta e organisacion internacional di Supreme Audit Institutions.

CAROSAI ta tene su congresonan cada tres aña unda cu e ultimo a tuma luga na 2019 na Guyana y eynan a dicidi cu na 2022 e congreso lo ta na Aruba, asina mes, cada tres aña un tema ta wordo scogi pa esaki unda cu e aña aki ta “Targeting Superior Audit Impact” con por logra pa e diferente institutonan aki pa nan auditoria y investigacionnan di control tin mas impacto, for di e tema ey ta bay tin diferente sub-tema cu ta regarda esey cu diferente presentacionnan cu panel di discusion y master class.

Un di nan ta: Retention of qualified staff • Limited scope for SAI financial independence • Stakeholder engagement and implementation of SAI recommendations due to the capacity and other challenges faced by users of SAI reports.

Croes-Williams tambe a indica cu den conferencia asina aki por haya hopi insides di cosnan cu otro Rekenkamer ta haci, un di e tareanan di CAROSAI tambe ta pa introduci standard internacional pa institutonan di auditoria superior cu tambe lo bira un discusion “pasobra como isla hopi chikito si bo kier mantene bo mes na cierto standard hopi halto di paisnan rico y grandi ta bay costa hopi placa, ki parti di e standard ey di con por haci audit por wordo introduci na Aruba, pa mehora e calidad y e impacto di e audit, e aña aki Aruba lo tin un country paper unda ta presenta un performance manager”, el a bisa.

Durante e congreso aki, tambe e presidencia di e organisacion ta wordo traspasa pa un otro miembro den caso aki tin e honor di presidi CAROSAI e biaha aki, Croes-Williams a expresa cu den conferencia aki e miembronan lo uni y lo tin invitadonan internacional cu no ta miembro, un punto importante cu el a trece dilanti ta cu esaki lo ta pa prome biaha den historia di forma ‘hibrid’ loke ta nifica cu un parti di e presentacionnan di e conferencia lo tuma luga na Aruba y otronan di manera online.

Ademas, el a bisa cu e lo duna na Aruba un exposure tremendo, pa motibo cu esaki ta e prome biaha cu lo tuma luga akinan y Aruba lo ricibi hopi bishitante importante door cu tur ta presidente of secretario di nan respectivo Algemene Rekenkamer.

Pa personanan interesa di haya mas informacion tocante e congreso aki por bishita e website www.rekenkamer.aw na unda por registra y por volg algun di e conferencianan cu ta dirigi pa publico en general.