Confusion y conmocion pa palapanan dilanti hotel

Recientemente a drenta un tip anonimo cerca nos redaccion informando cu e hotel Barcelo Aruba ta kitando e palapanan situa riba beach dilanti nan hotel poco poco y reemplasa esakinan cu palonan di coco. Esaki a trece hopi confusion y diferente reaccion di parti di turistanan como di hendenan local.

Manera ta conoci beachnan na Aruba ta publico, y no ta pertenece na ningun hotel. Por lo tanto palapanan ariba beach tambe ta wordo considera publico y pues por wordo usa pa cualkier persona cu yega prome.

Den algun caso esaki no ta aplicabel si e liña di propiedad di hotel ta extende te na cierto punto ariba beach of si e hotel a yaga na un acuerdo cu gobierno pa privatisa e uso di palapanan lagando e hotel mes construi e palapanan.

Falta di claridad den e topico a trece hopi confusion y disgusto enntre tanto turisto como localnan cu ta haci uso di palapanan pa proteha nan mes di e solo fuerte di Aruba mientras nan ta disfruta di nan dia na lama.

Mirando e reaccion ariba rednan social, Barcelo Group a publica un texto ariba nan cuenta oficial di Facebook, adresando e conmocion rondonando e topico aki.

“A yega na nos atencion cu tabatin discusionnan tocante e situacion di reservacion di stoel y palapas despues di un publicacion ariba rednan social. Gerencia di Barcelo Aruba kier clarifica cu e cantidad di stoel y loungers cu tin rond di pool actualmente ta mas hopi compara cu añanan anterior. Unico cos cu nos ta purba haci ta mehora e aspecto y haci e area di pool y hardinnan cu ta rondona esaki mas agradabel y lo mas facil cu por desde cu Barcelo Group a adkiri e propiedad”, e publicacion ta indica.

E publicacion ta enfatisa cu sinembargo pone mas stoel of loungers den e areanan aki ta bay contra e guianan di seguridad estableci pa autoridadnan local ya cu den caso di emergencia tin dos punto di encuentro y un di nan ta beach y pa mantene e area sigur pa un evacuacion eventual, e hotel no por pone mas mueble.

“E obhetivo di administracion semper tabata mantene e beach mas natural posibel y mantene e aspecto natural alrededor teniendo na cuenta e medio ambiente. Barcelo Group semper a respeta naturalesa y ta comprometi na mantene e terenonan limpi como tambe causa dañonan limita na beach, pasobra pa nos e sostenibilidad ta un di nos propositonan mas grandi”, nan a remarca.

Den e publicacion gerencia di e hotel ta señala cu e tema di palapanan ta un punto di discusion pa algun aña caba y pa evita cu esaki lo continua e hotel a dicidi pa elimina e palapanan y planta palo di coco na nan luga.

“Barcelo Aruba ta e unico propiedad di Barcelo Group cu tin palapa riba beach y esaki ta bay contra di nos standard. Por lo tanto nos lo ta kitando e palapanan gradualmente na medida cu nan deteriora y nos lo planta palo di coco pa brinda e sombra necesario pa tapa solo. Semper nos tabata cla y consecuente cu e politica aki y e aviso poni ariba beach for di momento cu e hotel a bira Barcelo ta demostra esaki”, nan a subraya.

Ariba rednan social turistanan a expresa nan frustracion pa cu henter e situacion aki. Un turista en particular a señala cu nan ta bay cancela nan reservacion pa Aruba ya cu un palo di coco no ta ofrece suficiente sombra y proteccion contra e solo cayente.

Otro turista ta menciona cu como doño di time share y miembro di Royal Club Barcelo, nan ta paga un suma pa mantenemento, den cual ta inclui palapa. Turistnan cu paga pa ‘All Inclusive’ ta paga tambe pa uso di palapa, pero aworaki cu nan no lo por haci di palapa, nan ta puntra kico Barcelo ta bay haci pa compensa pa e gasto aki si nan no lo por usa palapa mas.

Pa e palapanan cu t’ey ainda ariba beach tin un sistema di reservacion y e palapanan cu ta keda ta wordo reserva hopi lihe. Un turista ta comenta: “Tin un rason pakico hende ta lanta 4or di mainta pa reserva palapa. Nan kier y tin mester di sombra. E palonan di coco no ta brinda suficiente sombra”.

Otronan ta apoya e decision di e hotel pa kita e palapanan cu ta deteriora, en bes di drecha nan, y reemplasa nan cu palo di coco, y ta señala cu e palonan di coco si ta ofrece suficiente sombra y proteccion contra solo.

E falta di claridad ta crea confusion y e pregunta ta keda: si beach ta publico, un hotel tin e poder pa kita palapa y planta palo di coco?