For di un entrevista cu e portal Noticiacla a sostene e siman aki cu Secretario di Estado Alexandra van Huffelen, ta resulta cu e mandatario Hulandes ta desmenti cu ta Hulanda lo a bin na ultimo momento cu condicion adicional pa inclui den e ley local di supervision financiero.

Segun Van Huffelen ta gobierno di Aruba mes a inclui e puntonan referi den e proyecto pa cambio di ley di Aruba (LAft). En berdad, segun e mandatario Hulandes, tabatin discusion riba detaye di e puntonan te na ultimo, pero cu ambos banda a logra sali bon di esaki. E tabata categorico den su ponencia cu ta gobierno di Aruba a propone e puntonan aki den e cambionan den e ley local. Hasta el a duna como ehemplo cu den e caso di e proposicion pa prohibi uso di e formula di cooperacion publico/priva den e asina yama proyectonan ‘PPP’, ta gobierno di Aruba mes a insisti di inclui e prohibicion, mientras cu pa Hulanda lo tabata imaginable cu por usa e tipo di partnership aki. E puntonan inclui pa gobierno di Aruba tin nan origen den e propuesta di ley di Reino (RAft; proponi pa Hulanda na 2022; red.).

Segun por a scucha di Promer Ministro Evelyn Wever-Croes, despues di e reunion di Conseho di Ministro di Reino di fin di october 2023, Hulanda na ultimo ora lo a presenta tres condicion adicional, y Conseho di Ministro di Reino a opta pa duna e Secretario di Estado mandato pa delibera cu Promer Ministro di Aruba e ultimo detayenan, pa evita cu mester a bolbe na reunion di gobierno di Reino na fin di november pa aprobacion, mirando cu tempo lo tabata cortico pa pasa e cambio di ley na Aruba promer cu fin di aña.

Den e controversia aki no tur cos a keda bon cla, pero en todo caso tin algun hecho comproba. Esey ta entre otro cu gobierno di Aruba a manda un propuesta di ley pa Conseho Consultivo (Raad van Advies; RvA) dia 16 di juli 2023. E conseho di RvA a bay hunto cu e propuesta di ley di Aruba pa gobierno Hulandes na fin di augustus 2023.

For di e conseho di RvA (fecha 16 di augustus 2023) por destila cu cierto asunto tabata inclui caba den e propuesta ricibi. Esey ta entre otro e articulo tocante e normanan pa presupuesto, entre otro nivel di e surplus cu mester realiza (1% di GDP). RvA ta comenta cu e normanan aki ta tuma di e propuesta di e ley Hulandes. Esaki ta conta tambe pa e gastonan di personal, cu algun diferencia. Den e ley Hulandes e categorianan di gasto di personal, cu ta inclui den loke pa 2027 mester keda bao di 10% di GDP, ta aparece completamente den e articulo di ley mes. Den e propuesta di ley di Aruba a opta pa elabora riba e categorianan den e ‘Memorie van Toelichting’. For di e lista cu a keda por conclui cu gobierno a scoge pa no hinca e organismonan ehecutor di seguro social, SVb y AZV, den e lista mientras cu den e propuesta ley di Reino si nan ta aparece. RvA a pidi un splicacion y den contesta di gobierno riba e conseho di RvA, fecha 28 di november 2023, ta bisa cu gobierno a opta pa limita e lista na e casonan unda gobierno ta directamente responsable pa gasto di salario (AZV y SVb ta financia nan propio payroll. Di otro banda, gobierno ta keda cu e obligacion legal pa compensa deficit presupuestario di ambos organismo, loke por inclui tambe gasto di personal; red.).

Tin asunto cu a keda inclui na e propuesta di ley manera el a yega parlamento, cu inicialmente no tabata inclui den e version cu RvA a haya pa duna conseho na juli 2023. Esey ta e topico di e prohibicion di proyecto PPP, anteriormente menciona, y e asunto (den articulo 27a di e propuesta) di aprobacion di accountant pa e cuentanan anual di 2020 en adelante. Esakinan ta aspecto cu no a ricibi conseho di RvA, ya cu e inclusion a tuma lugar na ultimo ora. Redaccion di Bon Dia Aruba a haci pregunta riba esaki na Promer Ministro Wever-Croes y a haya como respuesta cu ta corecto cu no tin conseho riba eseynan, pero cu ta considera eseynan punto menor cu segun legislacion ta permisible. A confirma, di banda ministerial aki, un biaha mas cu ta puntonan cu ta Hulanda a trece dilanti y cu a keda inclui den e version final cu a bay Staten.

Nota di Redaccion:

No cabe duda cu e tipo di comentario aki, di ambos banda, no ta crea un bon base pa e continuacion di e negociacion tocante e ley di Reino, pa cual mester tin un acuerdo den e proximo lunanan, pa mas pronto posible por baha e interes cu Aruba mester paga. E propuestanan pa norma di presupuesto y e asunto di gasto di personal tabata claramente den e version cu RvA a ricibi na juli 2023 for di gobierno di Aruba. Di cualkier iniciativa nan ta bin, nan no ta asunto inclui na ultimo ora. Mas comentario den nos Editorial den e edicion aki.