Aña parlamentario nobo, y aña di eleccion tambe, a habri den un confusion bastante grandi. Ni di banda di e partido den gobierno, ni di oposicion tin un claridad pakico nan ta para y kico ta nan plan pa goberna den e siguiente periodo di gobernacion. Por bisa cu esey no ta tanto un problema, ya cu tin tempo suficiente pa elabora nan plan pa campaña. Pero no ta trata di esey, e ta mas bien e duda kico nan ta representa y den ki direccion nan ta desea di hiba nos pais. En e edicion di awe un bista riba partido den gobierno; mañan ta turno na oposicion.
Den e partido gobernante a surgi diferente division di diferente caracter cu a causa bastante confusion entre su base, pero cu no a yega na crea un situacion cu no por drecha ainda. Un di e factornan di mayor enfrentamento interno ta concerni e ministro encarga cu turismo. No ta solamente su bishita inespera cerca nos Gobernador pa keha tocante e situacion interno cu a bira casi ireconciliabel. E famoso nuebe puntonan a keda secreto, di manera cu no por averigua ken a cumpli cu kico, pero el a dicidi di keda, por lo pronto.
Tambe tur e speculacionnan tocante lantamento di un partido nobo a keda na nivel di rumor. Tanten nos no ta mira ningun persona acudi na presidente di Conseho Electoral pa registra, tur cos ta tambe speculacion. Pero un aspecto si a sali na cla y esey e problema tambe encuanto e organismo ‘independiente’ o ‘autonomo’ cu ta dirigi turismo. Ta trata di e recursonan financiero cu lo por alivia e situacion precario di cash flow di gobierno mes. Pakico?
Cu yudansa di su mesun coleganan, el a construi su ‘master plan’ pa turismo, inclusivo ranca tur entrada di impuesto relaciona cu turismo bay cu nan den e organismo aki, cu e so ta controla. E fondonan di reserva di ATA a bira bastante grandi y e pregunta legitimo ta surgi si no ta necesario y husto cu un parti mas grandi ta bay pa caha general di gobierno. Y no cu e ministro, si e kier, ta ‘regala’ otro ministerio fondo pa nan funciona for di reserva di ATA, den un gesto generoso di esun cu ta ‘call the shots’. Aparte di e hecho cu ta AVP mes a busca e problema aki, awor nan mester deal cu e asunto aki, unda tin un super ministro cu ta hinca man den maneho di otro colega, cu un sonrisa.
Di otro banda mester bisa cu ta debilidad di e ministro di Husticia cu a permiti prome cu su coleganan a afecta su presupuesto pa awor bin yora cu e mester mas placa, y rascando djente mester tolera cu su contrincante di turismo ta ofrece un limosna, pero e mester keda agradecido si. No ta Husticia ta e unico cu ta afecta. Ministerio di Enseñansa falta recurso na grandi y lo no kier bay mendiga cerca su colega di turismo. Den e situacion crea awor, cu caha general practicamente bashi, ironia ta cu esun cu ta desea di haya un cachi cachi por busca esaki cerca nan colega di turismo, na luga di bay cerca esun di Financia, cu no tin nada pa ofrece. Den e friccionnan interno ta bin acerca e problema di e amienda, cu ta considera di menos impacto pasobra aki ta trata placa, y esey sigur den e situacion actual ta mas importante cu ideologia y etica.
Con e weganan aki ta afecta e partido no ta sigur, pero bayendo pa eleccion e ambiente no por ta pio. Asina aki nos por mira un gobierno tur troci cu no ta mustra unidad mas. Den tur esey por observa un Prome Ministro cu ta casi completamente ausente. Solamente ora e mester duna apoyo na e ministro di Infrastructura contra atakenan di oposicion den parlamento, el a duna acto di presencia. Pero ora e mester sinta banda di ministro di Husticia pa hunto defende maneho encuanto orden y siguridad publico, cu ta su cartera, nada! Cu esaki Prome Ministro ta duna un señal bon cla ta ken e ta apoya. Un señal na e base den Playa Pabao ken e ta faborece na e momento aki como probabel number dos riba lista.
No tin un gobernacion coherente, tampoco den sentido di un plan di reactivacion economico cu ta atende e necesidadnan di henter economia. Ta papia solamente di rehabilitacion di e refineria, pero mientras e ministro encarga cu Asunto Economico practicamente a converti su mes den un tipo di ‘gobernador autoproclama’ di San Nicolas, no ta haci nada pa resto di nos economia, atendiendo e preocupacionnan di sector priva den su totalidad.
A pesar di e situacion confusivo aki, cu por bira mas serio si no resolve e problema financiero, futuro no ta mustra asina malo pa e partido den gobierno. Drenta aña di eleccion cu e fondonan di gobierno den bo man, cu cantidad di hende pa core campaña na logra di traha pa pueblo, semper ta un bentaha grandi. Y e falta di un oposicion fuerte ta un bonus adicional.
