Den nos editorial di ayera nos a enfoca riba algun asunto cu ta stroba un bista cla riba maneho di e partido den gobierno. Awe nos ta dedica atencion na e partidonan den oposicion y cu representacion den parlamento. Fresco den nos memoria ta ainda e forma di actua di e partido grandi den oposicion den caso di e famoso amienda encuanto registracion di pareha di mesun sexo. Banda di e sorpresa cu esaki a trece pa nan base, e incidente cu e votacion sorpresivo na fabor a trece na luz di dia cu no ta tur cos ta anda bon internamente. Tene un reunion di urgencia despues y sali pafo y declara cu tur cos ta bon tabata lo minimo cu e partido por a haci den e situacion aki pa mustra union.
Pero e problema mas grandi tabata cu e partido a permiti pa un partido cu por lo menos mester admiti cu nan a actua di forma astuto, tum’e di sorpresa. Esey ta indica tambe cu e partido opositor no a studia tur opcion legal, y di strategia y tactica durante e tratamento. Mucho menos a comunica cu publico riba e opcionnan, loke ta mustra riba un falta di comunicacion cu e base di apoyo. Awor cu e incidente mes a keda tras di lomba y e partido por bay ‘lembe su heridanan’, ta keda sin embargo e pregunta con bon e partido en general ta pa enfrenta e aña crucial di campaña y eleccion.
Ta parce cu e partido no ta den su miho epoca. Ta bisto cu loke nan ta trece dilanti den parlamento ta carece di bon investigacion y analisis, cu e resultado cu den parlamento gritamento ta domina riba critica fundamental bon documenta. Sigur den e caso di cuestionamento di ministro encarga cu infrastructura tabatin oportunidad pa haci un miho trabao. Ta preocupante pa mira cu desde e caida grandi despues di e derota electoral di 2009 y salida sucesivo di algun miembro prominente, e partido no a pasa den un proceso di reorganisacion, manera entre 2001 y 2009 partido AVP si a logra haci.
Ademas, cu e recursonan gubernamental na nan disposicion, partido AVP a sa di mara un grupo grandi di profesional cu un lealtad partidario fuerte. Ora nos bisa cu Prome Ministro ta responsabel pa e caso mas grave y bochornoso di patronahe politico den historia di Caribe Hulandes esey segun nos ta corecto, pero no ta splica ainda pakico el a haci’e. El a logra di haya un grupo cu no ta traha pa gobierno so, sino tambe pa partido den su structura interno. Esaki ta loke e partido grandi den oposicion no tin, pero cu no ta depende di nan permanencia den gobierno pa por logra. Esaki ta e trabao duro cu mester haci, contra biento y marea, den oposicion.
Y e falta obvio aki di un base di apoyo intelectual ta bira hopi dificil di compensa, faltando apenas un aña pa eleccion y solamente algun luna pa campaña cuminsa. Tambe ta di considera cu reclutacion pa traha como boluntario profesional ta bay man den man cu reclutamento di hende capacita pa eventualmente considera bay riba lista. No tin claridad riba ningun di e dos aspectonan awor aki.
E partido di un solo miembro tin e problemanan usual di, wel, un partido di un solo miembro. Tur cos ta draai rond di un persona so! No cabe duda cu e partido ta logra gana punto cu amienda cu ta exigi bon investigacion y formulacion, pero no ta e asuntonan cu ta atrae atencion di e gran mayoria di publico. Tur lider cu ta pretende di algun dia yega na goberna, mester presenta su mes como ‘e posibel proximo ministro presidente’. Awor aki esey no ta e caso, hopi biaha ta laga cierto topico pa e dos partidonan grandi bringa y ta crea di mes e imagen di un partido di ‘topico’. Cu esey bo ta mantene bo presencia, pero no ta permiti crecemento.
E punto cu mas ta ilustra e fayonan di e actual oposicion na e momento aki, ta e tema di reapertura di refineria. Pa demasiado tempo a purba competi cu partido di gobierno den bati riba pecho ken a logra esaki. No ta tene cuenta cu tur pregunta y duda cu un cantidad di ciudadano tin riba e asunto aki. Y no ta trata solamente di esunnan cu no tabata pro pa e refineria habri mes, sino di otronan cu ta na fabor, pero ta mira hopi riesgo den tuma e propiedad over bao di e actual condicionnan.
Nos ta tende algo di un nota critico di oposicion den esaki? Nos ta tende kico ta e puntonan cu nan ta bay vigila prome cu vota pa e leynan na caminda? Un simpel pregunta mas: banda di e leynan cu mester bin parlamento den e dianan aki, cuanto di e famoso 2000 pagina nan ta bay haya pa mira? Nos perdicion: nan no ta haya nada, y si nan vota contra, nan ta keda marca como esunnan cu ‘no kier reapertura’. Changa un biaha mas?
