Confusion di diferente propuesta di gobierno y parlamento Raad van Advies ta critica ley deficiente pa adapta salario di politico

Por medio di un carta fecha 06 di mei 2020 dirigi na presidente di Staten, Conseho Consultivo (Raad van Advies; RvA) di Aruba a duna nan reaccion riba e proyecto di ley di iniciativa pa reduci salario y demas beneficio di ministro, miembro di parlamento y ministronan plenipotenciario den cuadro di e situacion di emergencia den cual e pais ta actualmente, a causa di e coronavirus Covid-19.

E cambionan proponi den e proyecto di ley aki ta pa corta salario di politico cu 10% y pa henter aña 2020 no duna ningun beneficio particular (bijzondere uitkering) na politico. Esaki ta encera e asina yama ‘vakantie-uitkering (8¹/₃%) di e salario bruto.

Mientras e Conseho tin comprension pa e motibonan pa cual ta haci esaki, toch ta keda varios pregunta y critica.

No ta cla pa RvA con e relacion ta cu e medidanan di austeridad cu gobierno tin planea pa tuma. No ta bisa si a coordina e propuesta aki cu gobierno, ya cu e ta toca tambe e ministro y ministronan plenipotenciario. Tambe con esaki ta pas den e plannan di gobierno pa austerisa y si e propuesta di Staten aki lo tin e efecto cu gobierno ta desea. Claridad den esaki lo ta necesario pa por evalua ki efectividad y factibilidad esaki tin.

Relaciona cu esaki RvA ta observa cu gobierno a presenta un plan na e sindicatonan unda a presenta pa e ministronan un reduccion di salario di 12% y no ta paga e vakantie-uitkering pa 2020. Ademas ta constata cu durante tratamento di presupuesto 2020 di Staten a aproba un amienda den cual a aproba un reduccion di 25% riba salario incluyendo e no pago di e vakantie-uitkering, loke no ta cuadra cu e proyecto di ley aki. Ta recomenda por lo tanto pa trece mas claridad den e asunto aki y laga sa kico definitivamente ta scoge.

Tambe e organismo di conseho ta observa cu den e splicacion no ta indica kico ta loke ta spaar cu e medida aki, ni tampoco con a yega na e reduccion proponi pa funcionarionan politico. Esaki ta contra loke articulo 6 inciso 1 di Comptabiliteitsverordening 1989 ta stipula. RvA ta haya cu mester cumpli cu esaki.

Tampoco a duna un splicacion kico ta e consecuencianan financiero pa e politiconan di añanan anterior y nan eventual herederonan. Den presupuesto 2020 ta aparece un suma di 4 miyon florin pa esaki y e pregunta ta anto cu cuanto e medida aki ta rebaha e suma ey.

Tambe RvA tin algun observacion tecnico, entre otro cu ta maneha dos version di titulo pa e ley unda ta papia un biaha di ‘tijdelijke verlaging voorzieningen’ y den otro di ‘tijdelijke verlaging bezoldiging’ di funcionario politico. Tambe cu ta maneha e modelo di un cambio di ley mientras aki ta trata di un proyecto di ley nobo. Mirando tur esaki ta pidi pa revisa e proyecto di ley aki y tambe RvA ta puntra su mes si a pidi asistencia di Directie Wetgeving den preparacion di e ley aki y ta conseha pa laga haci esey, si e no a sucede ainda, pa garantisa calidad y consistencia den legislacion.

Por lo demas e Conseho por ta di acuerdo cu e meta di ley pero no cu e contenido y ta duna den consideracion pa no procede cu esaki, promer cu atende e recomendacionnan haci. Tambe ta duna na consideracion atende e asunto cu gobierno pa percura pa acopla di forma corecto cu e maneho general di austerisacion cu gobierno tin.

Nota di redaccion:

Di fuente informal nos a haya informacion cu lo tin un otro proyecto di ley na caminda pa reemplaza esaki. Tambe gobierno mes lo mester traha un presupuesto modifica ainda. Cu esey e pregunta ta si tur esaki no tabata tempo y recurso gubernamental perdi, mirando tambe e multiple fayonan constata den e proyecto di ley aki.